Այսօր վարչապետ Նիկոլ Փաշինյանն այցելել էր Արտակարգ իրավիճակների նախարարություն, որտեղ նրան ներկայացրեցին ԱԻՆ հրշեջ նոր ավտոմեքենաները: Ճապոնիայի միջազգային համագործակցության գործակալության կողմից այդ մեքենաները ՀՀ-ին որպես աջակցություն են տրամադրվել: Ըստ այդմ, ԱԻՆ փրկարար ծառայության Սյունիքի, Լոռու եւ Շիրակի մարզային հրշեջ փրկարարական ստորաբաժանումները արդիականացվելու են: Ճապոնիայի կառավարությունը տրամադրում է 36 միավոր հրշեջ մեքենա, 3 սանդուղքավոր մեքենա, պահեստամասեր եւ այլն: Ծրագրի արժեքը կազմում է շուրջ 14,5 մլն դոլար
Իր ելույթում վարչապետը շնորհակալություն հայտնեց Ճապոնիայի կառավարությանը՝ տարիներ շարունակ ցուցաբերվող օգնության համար:
Նախարար Ֆելիքս Ցոլակյանը լրագրողների հետ զրույցում հարցին՝ այժմ խոսվում է պետական համակարգում աշխատողների աշխատավարձերի բարձրացման մասին, ԱԻՆ-ում աշխատավարձերը բարձրանալո՞ւ են, թե՞ չեն բարձրանալու՝ պատասխանեց, որ առաջարկը ներկայացրել են, բայց չեն կարող ասել՝ ինչ չափով կբարձրանա: Նա ասաց, որ ներկայումս, հաշվի առնելով, որ շարքային անձնակազմի աշխատավարձը շատ ցածր է, փորձում են պարգեւավճարներ տալ եռամսյակը մեկ, որի հաշվին աշխատավարձը մոտ 30 տոկոսով ավելանում է:
Լրագրողները հետաքրքրվեցին՝ արդեն մեկ տարի է անցել, ինչ Նիկոլ Փաշինյանն ընտրվեց վարչապետ, այս մեկ տարին ինչպե՞ս կգնահատեք՝ Ցոլակյանը պատասխանեց, որ շատ լավ. «Արվել են գործեր, որոնք շատ օգտակար են եղել բնակչության համար: Մենք փորձել ենք ավելի մոտենալ մարդկանց, շարունակվում են այդ փոփոխությունները»:
Կարդացեք նաև
Հարցին՝ բնակչության սպասելիքները վարչապետ Փաշինյանից, ըստ ձեզ, այս մեկ տարվա ընթացքում արդարացա՞ն, իրականացա՞ն, թե՞ ավելին կարելի էր անել՝ Ֆելիքս Ցոլակյանը պատասխանեց. «Մեկը տերտեր է սիրում, մեկը՝ տերտերի կնիկ, հմի ո՞նց ասեմ ձեզ: Մեկը սենց է սպասում, մեկը՝ նենց է սպասում, հիմա մեկն ուզում է տեսնել, որ շատ լավ է ամեն ինչ, մյուսը՝ չէ: Մարդկանց տարբեր գնահատականներ կան, բայց ես գնահատում եմ լավ, դրական, այսպես էլ պետք է լիներ, ես այսպես էլ սպասում էի»:
Հռիփսիմե ՋԵԲԵՋՅԱՆ
