«Դիմել եմ աշխատակազմին և խնդրել հետաձգել այսօր նշանակված դատական նիստը»,-Aravot.am-ի հետ զրույցում տեղեկացրեց «Ֆլեշ» ՍՊԸ-ի նախագահ Բարսեղ Բեգլարյանի պաշտպան Վահագն Թորոսյանը:
Հիշեցնենք՝ ՀՀ քննչական կոմիտեի ԵՔՔՎ Կենտրոն և Նորք -Մարաշ վարչական շրջանների քննչական բաժնում քննվող քրեական գործով մեղադրանք է առաջադրվել «Ֆլեշ» ՍՊԸ-ի նախագահ Բարսեղ Բեգլարյանին` բռնության գործադրմամբ, դրա գործադրման սպառնալիքով ինքնիրավչության համար։
Երևանի ընդհանուր իրավասության դատարանի Ավան և Նոր Նորք վարչական շրջանների նստավայրում «Ֆլեշ» ՍՊԸ-ի նախագահ Բարսեղ Բեգլարյանի և «Ֆլեշ» ՍՊԸ-ի բազայի պետ Հրայր Հովսեփյանի գործով դատական հաջորդ նիստը տեղի կունենա մայիսի 17-ին՝ ժամը 14.30-ին:
Վահագն Թորոսյանը մեզ հետ զրույցում մանրամասնեց նիստի հետաձգման պատճառները. «Նիստը հետաձգվեց, քանի որ ես դեռ չեմ հասցրել ծանոթանալ գործի նյութերին: Նոր եմ ընդգրկվել գործով որպես պաշտպան. ինձ ժամանակ է պետք նյութերին ծանոթանալու համար: Նախորդ դատական նիստին որոշված էր դատական հաջորդ նիստի օրը՝ մայիսի 6-ը: Ինձնից փորձեցին ճշտել բավարա՞ր է այդ ժամկետը նյութերին ծանոթանալու համար, ասացի կփորձեմ, ասացին, եթե չհասցնեմ, տեղեկացնեմ աշխատակազմին: Ուստի այսօրվա նիստը հետաձգելու միջնորդություն ներկայացրի»:
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ «Շանթ» հեռուստաընկերության
