Այսօր աշխատանքի եւ սոցիալական հարցերի նախարար Զարուհի Բաթոյանից հետաքրքրվեցին՝ ինչպես է, որ ինքը դատապարտել է մայիսի 4-ին «Բուկինիստ» սրճարանում «Իմ մարմինը անձնական է» գրքի շնորհանդեսի տապալումը, իսկ ՀՀ երկրորդ նախագահ Ռոբերտ Քոչարյանի ասուլիսի տապալումը (լուսանկարում) չի դատապարտել:
«Դուք սպասում էիք, որ ես Ռոբերտ Քոչարյանի ասուլիսի տապալումը պետք է դատապարտե՞մ: Ո՜չ, ես երկակի ստանդարտ չեմ տեսնում, որովհետեւ խոսքը հասարակական կազմակերպության քննարկման մասին է: Խոսքն ասուլիսի մասին չի եղել, ազատ խոսքի սահմանափակում չի եղել: Խոսքն ազատ գործելու հնարավորության մասին է»,-հարցին ի պատասխան ասաց Զարուհի Բաթոյանը՝ 100 օրվա առիթով նախարարությունում կազմակերպված ասուլիսում:
Ըստ նախարարի. «Ձեր նշած ասուլիսը բոլորովին այլ պայմաններում էր, բոլորովին այլ իրավիճակում: Այս իմաստով որեւէ ընդհանուր բան չեմ տեսնում այդ ասուլիսի եւ գրքի քննարկման միջեւ»,-ասաց նա:
Լուսինե ԲՈՒԴԱՂՅԱՆ
