«ԶԼՄ-ներից եմ լսել, բայց ինչ հիմքով է, ինչ պատճառով է, ոչ մի բան չեմ կարող մեկնաբանել: Ես այլ աղբյուրներից ինֆորմացիա չունեմ: Ինչ-որ քննարկում էր եղել մինչեւ այդ, բայց քանի դեռ չկա որոշում, չենք տեսել ինչ հիմքով է, կդժվարանամ ինչ-որ բան մեկնաբանել»,- մեզ հետ զրույցում երկրորդ նախագահ Ռոբերտ Քոչարյանի պաշտպաններից Արամ Օրբելյանն այսպես արձագանքեց մեր հարցին, թե ի՞նչ տեղեկություններ ունի դատավոր Վարդան Գրիգորյանի (լուսանկարում) ինքնաբացարկի վերաբերյալ:
«Ժողովուրդը» հրապարակել էր, որ Երեւան քաղաքի ընդհանուր իրավասության դատարանի դատավոր Վարդան Գրիգորյանը, որը պետք է քններ «Մարտի 1»-ի քրեական գործը, ինքնաբացարկ է հայտնել: Այս տեղեկությունը «Հետքի» հետ զրույցում հաստատել են դատական դեպարտամենտից:
Նույն դատավորը օրեր առաջ վստահեցրել էր. «Ինձ ոչ մեկի գործոնը չի կարող կաշկանդել, ես միշտ անկախ եմ»:
Հիշեցնենք, որ ապրիլի 29-ին 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործից անջատված մասով նախաքննությունն ավարտվել է: ՀՀ պաշտոնաթող նախագահ Ռոբերտ Քոչարյանի, ՀՀ զինված ուժերի գլխավոր շտաբի պետի պաշտոնը զբաղեցրած Սեյրան Օհանյանի, ՀՀ պաշտպանության նախարարի տեղակալի պաշտոնը զբաղեցրած Յուրի Խաչատուրովի եւ ՀՀ նախագահի աշխատակազմի ղեկավարի պաշտոնը զբաղեցրած Արմեն Գեւորգյանի վերաբերյալ քրեական գործը ուղարկվել է Երեւան քաղաքի ընդհանուր իրավասության դատարան եւ գործի քննությունը մակագրվել էր դատավոր Վարդան Գրիգորյանին:
Կարդացեք նաև
Թե ինչ հիմքեր կային նրա ինքնաբացարկի համար, հիմնական վարկածն այն էր, որ Քոչարյանի պաշտպաններից Ռուբեն Սահակյանը, երբ Փաստաբանների պալատի նախագահ է եղել, Վարդան Գրիգորյանն աշխատել է որպես փաստաբան, հետեւաբար կարող է կաշկանդվածություն ունենալ:
Հռիփսիմե ՋԵԲԵՋՅԱՆ
