Երեւանի քաղաքապետարանը մայիսի 7-ին մրցույթ է հայտարարել Ռաֆայել Վահանյանի մարզադպրոցի տնօրենի պաշտոնի համար, որին լեգենդար գրոսմայստերը տարիքային ցենզի պատճառով մասնակցել չի կարող: Մրցույթի առիթով Հայաստանի ճանաչված գրոսմայստերները բաց նամակ են գրել վարչապետ Նիկոլ Փաշինյանին:
«Բաց նամակ ՀՀ վարչապետ Նիկոլ Փաշինյանին,
պատճենը՝ Երևանի քաղաքապետ Հայկ Մարությանին
Երևանի քաղաքապետարանը հայտարարել է մրցույթ «Ռաֆայել Վահանյանի շախմատի մանկապատանեկան մարզադպրոց» ՀՈԱԿ-ի տնօրենի պաշտոնի համար: Ներկայումս դպրոցի տնօրեն է հանդիսանում Երևանի պատվավոր քաղաքացի, միջազգային գրոսմայստեր Ռաֆայել Վահանյանը, ում անունով էլ կոչվում է դպրոցը: Ռաֆայել Վահանյանը համարվում է հայկական շախմատի կենդանի լեգենդ, նա ԽՍՀՄ հավաքականի կազմում 1984 և 1986 թվականների համաշխարհային շախմատի օլիմպիադաների, 1985 և 1989 թվականների աշխարհի թիմային առաջնությունների, 1980, 1983 և 1989 թվականների Եվրոպայի թիմային առաջնությունների չեմպիոն է: Ռաֆայել Վահանյանը մեծ ավանդ ունի Հայաստանում շախմատի զարգացման և հանրահռչակման գործում:
Գրոսմայստերների համար մեծ անակնկալ էր նման մրցույթի անցկացումը: Ամբողջ շախմատային ընտանիքի և նրա շուրջը կանգնած մարդկանց կարծիքով, նման մրցույթի անցկացումը դիտվում է շատ բացասական: Ընդհակառակը, պետք է ամեն ինչ անել, որպեսզի Ռաֆայել Վահանյանը շարունակի աշխատել և իր գիտելիքները փոխանցի ապագա սերունդներին: Մեր շախմատային ընտանիքն ուրախ է և շնորհակալ, որ Ռաֆայել Վահանյանը տնօրինում է իր անունը կրող դպրոցը և այդ մրցույթը չպետք է վերաբերվի մեր Լեգենդին, քանի որ նրա ամեն մի խոսքը, ամեն մի բացատրությունը, նրա ներկայությունը մեծ ներդրում է գալիք սերունդների զարգացման համար:
Կարդացեք նաև
Համաշխարհային օլիմպիադայի եռակի չեմպիոն, գրոսմայստեր Վլադիմիր Հակոբյան
Համաշխարհային օլիմպիադայի կրկնակի չեմպիոն, գրոսմայստեր Արտաշես Մինասյան
Համաշխարհային օլիմպիադայի կրկնակի չեմպիոն, գրոսմայստեր Տիգրան Լ. Պետրոսյան
Հայաստանի տղամարդկանց հավաքականի գլխավոր մարզիչ, գրոսմայստեր Արշակ Պետրոսյան
Աշխարհի թիմային չեմպիոն, գրոսմայստեր Ռոբերտ Հովհաննիսյան
Աշխարհի թիմային առաջնության բրոնզե մեդալակիր, գրոսմայստեր Հրանտ Մելքումյան
Հայաստանի կանանց հավաքականի գլխավոր մարզիչ, գրոսմայստեր Զավեն Անդրիասյան
Հայաստանի ազգային հավաքականի անդամ, գրոսմայստեր Արման Փաշիկյան
Վետերանների աշխարհի և Եվրոպայի չեմպիոն, գրոսմայստեր Կարեն Մովսիսյան
Գրոսմայստեր Սամվել Տեր-Սահակյան
Մինչև 18 տարեկանների աշխարհի և Եվրոպայի չեմպիոն, գրոսմայստեր Մանուէլ Պետրոսյան
Գրոսմայստեր Արամ Հակոբյան
Գրոսմայստեր Կարեն Գրիգորյան
Գրոսմայստեր Գևորգ Հարությունյան
Գրոսմայստեր Վահե Բաղդասարյան
Գրոսմայստեր Արման Միքայելյան
Գրոսմայստեր Տիգրան Հարությունյան
Գրոսմայստեր Հովիկ Հայրապետյան
Գրոսմայստեր Լևոն Բաբուջյան»։
