Ի՞նչ է տվել անցած տարիների ընթացքում Հայաստանի անդամակցությունը ԵԱՏՄ-ին, այսօր ԶԼՄ-ների հետ հանդիպման ժամանակ վերլուծեց տնտեսագետ Կառլեն Խաչատրյանը:
«Եթե նայում ենք այս տարիների ընթացքում ԵԱՏՄ-ում Հայաստանի դերակատարման ու առհասարակ ԵԱՏՄ անդամ մյուս երկրների միջեւ փոխադարձ առեւտրաշրջանառության դինամիկային, տեսնում ենք, որ Հայաստանը հատկապես Ռուսաստանի հետ է ավելի է խորացրել առեւտրատնտեսական հարաբերությունները թե արտահանման, թե ներմուծման տեսանկյունից: Բայց միեւնույն ժամանակ պետք է նաեւ ընդունենք, որ ԵԱՏՄ անդամ մյուս երկրների միջեւ ապրանքաշրջանառությունը ենթադրվող կամ կանխատեսվող տեմպերով չի զարգանում: Կարծում եմ, առաջիկա տարիներին անդամ երկրները հատկապես դրա վրա պետք է ուշադրություն դարձնեն, որովհետեւ փաստացի ստացվում է, որ Եվրասիական տնտեսական տարածքում հիմնական խաղացողը Ռուսաստանն է ու բոլոր երկրները հիմնականում փոխադարձաբար Ռուսաստանի հետ են իրենց կապերը զարգացնում, իսկ երկուստեք հարաբերությունները տնտեսական իմաստով այնպես չեն զարգանում, ինչը որ ցանկալի է»,-ասաց նա:
Աշոտ ՀԱԿՈԲՅԱՆ
