Տնտեսական զարգացման եւ ներդրումների նախարար Տիգրան Խաչատրյանն այսօր մամուլի ասուլիսի ժամանակ պատասխանելով հարցին՝ վարչապետի հայտարարած 50 հազար աշխատատեղերից որքա՞նն է նորաստեղծը, ասաց. «Մենք բոլոր ստեղծված աշխատատեղերի մասին չէ, որ գիտենք»: Ապա նախարարը բացատրեց՝ տեղյակ են լինում միայն այն աշխատատեղերի մասին, երբ գործարարը դիմում է կառավարությանը, ասում ՝ արտոնություն տվեք, այսքան այսքան աշխատատեղ կբացեմ: Նախարարը վստահեցրեց՝ հետո արտոնություն ստացողը հաշվետվություն է ներկայացնում ստեղծված այդ աշխատատեղերի մասին. «Մարդը դիմում է կառավարությանը եւ ասում՝ տվեք ինձ այս արտոնությունը եւ ես կստեղծեմ, օրինակ՝ 600 աշխատատեղ 3 տարվա ընթացքում: Բայց դա չի նշանակում, որ այդ աշխատատեղերը ստեղծվեցին այս տարվա առաջին եռամսյակի ընթացքում: Նույն կերպ այսօր ստեղծվում են աշխատատեղեր, որովհետեւ կառավարությունը 2 տարի առաջ արտոնություն էր տվել եւ ծրագրի իրականացումը սկսվել էր 2 տարի առաջ: Այդ ծրագրերով 2018-ին ստեղծված աշխատատեղերը մի քանի հազար են»:
Տիգրան Խաչատրյանի դիտարկմամբ՝ վարչապետի հայտարարած 50 հազար աշխատատեղերի ցուցանիշում ներառված են նախկինում գոյություն ունեցած, բայց նոր գրանցված աշխատատեղերը:
Նախարարի խոսքերով՝ վիճակագրությունը չի կարող տարբերել, թե այդ աշխատատեղը, որ գրանցվեց հարկայինում, դրանք այն աշխատատեղերն են, որոնք նոր են ստեղծվել, թե՞ այն աշխատատեղերն էին, որ ինչ-որ ձեւով գոյություն ունեին, բայց այսօր ստվերից դուրս են եկել. «Մեր գնահատմամբ՝ այդ 50 հազարից 1/5-ը նոր աշխատատեղերն են եղել, մնացածը նոր գրանցվածներն են»: Այսինքն, ըստ նախարարի, նոր աշխատատեղերը մոտ 10 հազարն են:
Նելլի ԲԱԲԱՅԱՆ
