Արթուր Վանեցյան. «Իսկ ինչո՞վ է տարբերվում Դավիթ Սանասարյանը ՀՀ այլ քաղաքացիներից. եթե կապացուցվի, որ թույլ է տրվել կեղծիքներ, պատասխան կտամ»

«Կա դատախազություն, կա համապատասխան ընթացակարգ, թող դիմեն դատախազությանը, եթե նման հարցեր կան, դատախազությունը որոշում կկայացնի: Այն հայտարարությունները, որոնք արվում են քրեական գործի վերաբերյալ, ակնհայտ ուղղորդվող… փորձում են ուղղորդել, տպավորություն ստեղծել…չգիտեմ ով է ուղղորդում,  ով որ անում է հայտարարությունները»,-այսօր այս մասին պատասխանելով Factor.am-ի  եւ Armlur.am-ի լրագրողների հարցերին, ասել է Ազգային անվտանգության տնօրեն Արթուր Վանեցյանն, պատասխանելով հարցին՝ հեմոդիալիզի պարագաների գնման գործով կալանավորված, ապա ազատ արձակված Ադյանին ԱԱԾ քննիչները «կոմպրոմիսներ են» ներկայացրել:

Ազգային անվտանգության ծառայության եւ պետական վերահսկողական ծառայության միջեւ կռիվ կա, քանի որ ՊՎԾ-ն միակ կառույցն է, որը կարող է ստուգել ԱԱԾ-ին. այս հարցին ի պատասխան էլ Վանեցյանն ասել է՝«Ձեզ միայն թվում է, որ միակ կառույցն է,  որը կարող է ստուգել: Ընդհակառակը, ՊՎԾ-ն ֆինանսաբյուջետային մասով է ստուգում  ուրիշ մաս ստուգելու լիազորություն չունի: Մեզ կարող է ստուգել ՀՔԾ-ն ու դատախազությունը»: Հարցին՝ ինչո՞ւ ԱԱԾ-ում որեւէ կոռուպցիոն բացահայտում չի եղել, Վանեցյանն այս հարցին էլ այսպես է պատասխանել. «Վստա՞հ եք, որ չի բացահայտվել»: Իսկ թե ինչու այդ մասին հանրությունը տեղյակ չի եղել, Վանեցյանը պատասխանել է՝  նպատակահարմար չի եղել:

ՊՎԾ պետ (լիազորությունները կասեցված են) Դավիթ Սանասարյանի վերաբերյալ ԱԱԾ ղեկավարը շտապել է կարծիք հայտնել, իսկ արդարադատության նախարարն էլ կասկածի տակ է առել քրեակատարողական հիմնարկում ԱԱԾ բացահայտումը: Այս առնչությամբ Վանեցյանը պատասխանել է՝ «Դե, թող բոլորը կասկածի տակ դնեն, ի՞նչ ասեմ: ԱԱԾ-ն անում է իր աշխատանքը շատ թափանցիկ, մաքուր, օրենքի կետերի պահպանմամբ: Եթե կլինի մի դեպք, որ ԱԱԾ-ն ինչ-որ անձի նկատմամբ իրականացնի ապօրինի հետապնդում, ես պատրաստ եմ պատասխան տալ թե՛ օրենքի, թե՛ հասարակության առջեւ: Հորդորում եմ չփորձել արհեստական աղմուկ սարքել ԱԱԾ-ի շուրջ, ծառայությունը կարճ ժամանակահատվածում ձեռք է բերել մեծ հեղինակություն, եւ որեւէ մեկը իրավունք չունի խոսել շանտաժի… կամ փորձեն վախեցնել, որպեսզի մենք մեր գործառույթը չիրականացնենք»:

Ըստ Վանեցյանի,  անկախ նրանից անձը զբաղեցնում է պաշտոն, հանդիսանում է այս կամ այն կուսակցության անդամ կամ ղեկավար, եթե հանցանք է գործել, պատասխան է տալու օրենքի առջեւ. «Եթե օրենքը խախտած չի անձը,  անկախ նրանից՝ կլինի մեր համախոհը, թե թշնամին, իրեն չենք կարող ենթարկել պատասխանատվության կամ հետապնդել: Որ օրը կլինի նման դեպք, ես ոչ կաշխատեմ ազգային անվտանգության ծառայությունում,  ոչ  էլ կկարողանամ հասարակության, քաղաքացիների աչքերին պարզ նայել: Ես ամեն օր փողոց եմ դուրս գալիս, տեսնում եմ մարդկանց վերաբերմունքը»:

Եթե Սանասարյանի մեղադրանքը չապացուցվի պատրա՞ստ է հրաժարական տալ, ԱԱԾ տնօրենը պատասխանեց. «Իսկ ինչո՞վ է տարբերվում Դավիթ Սանասարյանը ՀՀ այլ քաղաքացիներից: Դուք պատկերացնու՞մ եք՝ ինչքան մարդու է մեղադրանք առաջադրվում ԱԱԾ քննչական դեպարտամենտում, որը հետագայում նախաքննության ընթացքում չի հաստատվում: Եթե կապացուցվի, որ Դավիթ Սանասարյանի գործի շրջանակում ԱԱԾ-ն թույլ է տրվել կեղծիքներ, ապօրինություններ,  ապա թույլ տվողը  պատասխան կտա օրենքի առջեւ, իսկ ես՝ որպես ԱԱԾ տնօրեն, որի լիազորությունների մեջ է մտնում վերահսկել այդ մարդկանց գործողությունը, այդ ժամանակ պատասխան կտամ»:

Հայտարարությանը՝ թե Վանեցյանն ազդում է  գործի վրա, վերջինս պատասխանել է. «Ես չեմ ազդում: Ես, որպես հետաքննության մարմնի ղեկավար, ամբողջությամբ տիրապետում եմ գործի մանրամասներին»:

Շրջանառվող լուրերի մասին՝ թե կա ԱԱԾ տեսանյութ, որտեղ Սանասարյանը կաշառք է վերցնում, եւ  սա հաստատվելու դեպքում, ինչպես  Սանասարյանն է ասել, պատրաստ է ձեռքը կտրել, Վանեցյանն ասել է.«Չեմ կարծում, որ անդամահատության կարիք է լինելու»:

ՔՈ անդամ Գարեգին Միսկարյանին Վանեցյանի ներկայացուցչի՝ ԱԱԾ ձեւաթղթով ու կնիքով նամակն արդյոք խոսքի ազատության դեմ չէ ուղղված, Վանեցյանն ասել է.«Եթե ստի դեմ է ուղղված, ակնհայտ սուտ տեղեկատվություն են տարածում…հերքել եմ: Անընդհատ տարածելու իմաստը ո՞րն է, արհեստական աղմուկ է ստեղծվել, իմ անձի շուրջ, չգիտեմ, ում է ձեռք տալիս»:

Պատրաստեց՝ Նելլի ԲԱԲԱՅԱՆԸ