«Միհրան Պողոսյանի արտահանձնման գործընթացը բնական էքստրադիցիոն գործընթացի մեջ է»,-խորհրդարանում լրագրողների հետ զրույցում ասաց ՀՀ գլխավոր դատախազ Արթուր Դավթյանը։ Հիշեցնենք, ԴԱՀԿ նախկին պետ, ՀՀԿ-ական նախկին պատգամավոր Միհրան Պողոսյանն օրերս կալանավորվել էր Կարելիայի հանրապետությունում: Նա ՌԴ-ից քաղաքական ապաստան էր խնդրել:
«Արտահանձնման գործընթացի իրակացման ընթացում ենթակա անձը կարող է կոնկրետ երկրում դիմել ապաստան ստանալու խնդրով։ Միջազգային իրավական կարգավորումների համաձայն, գործընթացը գաղտնի է. պետությանը, որին դիմում են, պարտավոր է չհրապարակել: Մենք էլ ենք ունենում բազում գործեր, երբ հետախուզվողին հայտնաբերում ենք, էքստրադիցիոն գործընթացում դիմում են ապաստանի համար: Մենք պարտավոր ենք պահպանել միջազգային իրավական փաստաթղթերով սահմանված ընթացակարգերը որը ենթադրում է դրա համար պատկան մարմինների քննարկում, որոշման կայացում: Սա էլ ենթակա է վիճարկման` դատական եռաստիճան կարգով: Մինչեւ չավարտի անձը այդ գործընթացները, մենք չենք կարող հանձնել»։
Լրագրողներից մեկի հարցին`Հայաստանի համար ամոթ չէ, որ իր նախկին բարձրաստիճան պաշտոնյան, այլ երկրից քաղաքական ապաստան է հայցում: Արթուր Դավթյանը պատասխանեց, որ դա անձի իրավունքն է եւ ինքն այն կարծիքին չէ, որ ամոթալի է: «Յուրաքանչյուր սուվերեն պետություն ինքն է որոշում հարցի լուծումը»,- հավելեց նա։
Գլխավոր դատախազը համաձայն չէ լրագրողների դիտարկումների հետ, որ իրավապահ մարմինները հաճախ դանդաղում են հանրային հնչեղություն ունեցող անձանց գործերով: Հարցը մասնավորաբար, Միհրան Պողոսյանի մասով էր, երբ նրա գտնվելու վայրը վաղուց հայտնի էր: «Կոնկրետ ձեռք բերված գործերից ոչ մեկով իրավական համակարգի դանդաղում չի եղել: Որ պահին եղել են անհրաժեշտ հիմքեր` հետապնդում իրականացնելու, հենց այդ պահին դա իրականացվել է»,- պնդեց Արթուր Դավթյանը: Նա չբացառեց, որ հավանական է՝ ՌԴ-ն ապաստան կտա Միհրան Պողոսյանին, եւ արտահանձնումը կչեղարկվի: Արթուր Դավթյանն ասաց, որ քրեական հետպնդումից ազատվելու փորձեր անում են գրեթե բոլոր հետախուզվողները, բայց, իր գործունեության ընթացում չի եղել դեպք, որ այդ ճանապարհով որեւէ մեկը խուսափի պատասխանատվությունից։
Կարդացեք նաև
Ինչ վերաբերվում է պաշտոնաթող նախագահ Սերժ Սարգսյանի եղբորորդու` Նարեկ Սարգսյանի գործին, որը, ըստ լուրերի, Չեխիայի Հանրապետությունում է քաղաքական ապաստան հայցել, գլխավոր դատախազն ասաց` նույն գործընթացն է։
Նելլի ԳՐԻԳՈՐՅԱՆ
