Այսօր ԱԺ տնտեսական հարցերի մշտական հանձնաժողովին ներկայացվեց Հարկային օրենսգրքում փոփոխություն կատարելու մասին նախագիծը, որը ներկայացրեց ՊԵԿ փոխնախագահ Արթուր Մանուկյանը: Նախագծով առաջարկվում է հարկային գաղտնիքից օգտվելու մասին կարգավորումները հստակեցնել, այսինքն՝ կառավարությանը տալ լիազորություններ՝ հարկային գաղտնիք պարունակող տեղեկատվությունն օրենքով սահմանված կարգով այլ պետական մարմնին տրամադրելու վերաբերյալ:
«Իմ քայլը» խմբակցության պատգամավոր Հայկ Գեւորգյանը ՊԵԿ փոխնախագահին հարց ուղղեց, որն այս նախագծին չի վերաբերում, բայց առնչվում է հարկային գաղտնիքին, եւ ինչպես պատգամավորն ասաց՝ լրջագույն խնդիր է:
«Իրականում ոչ ոք չի հերքի, որ խոշոր գործարարները, հատկապես ներկրողներն ու մատակարարները առցանց ռեժիմով հետեւում են իրենց մրցակիցների գործողություններին՝ իր մրցակիցը որեւէ խանութին, որեւէ գնով ինչ-որ ապրանք մատակարարեց՝ 3 րոպե հետո հաշիվ-ապրանքագիրն իր հեռախոսի վրա ուղարկված է: Ո՞նց է պետք է դա կանխել: Սա լրջագույն խնդիր է»,- հետաքրքրվեց Գեւորգյանը:
ՊԵԿ փոխնախագահն արձագանքելով հարցին ասաց՝ «Նման բան որեւէ մեկն իրավունք չունի տրամադրել, եթե տրամադրել է՝ դա օրենքի խախտում է եւ պետք է պատասխանատվություն կրի»: Մանուկյանը վստահեցրեց. «Մեր համակարգի միջոցով մեկը մյուսին հետեւեն՝ ես բացառում եմ: Չկա նման բան: Խոսքը կարող է գնալ տեղեկատվության ապօրինի արտահոսքի մասին եւ պետք է կոնկրետ դեպքը նայել ու պատասխանատվության ենթարկել»:
Կարդացեք նաև
«Խոսքը հենց արտահոսքի մասին է, ՊԵԿ որոշ ծառայողներ, որոշ շահագրգռվածությունից ելնելով՝ մեկը՝ մեկի մոտ է աշխատում, ձեռքի տակ է ամբողջ բազան, հետեւում են՝ ինչ ու որքանով վաճառեց: Վստահեցնում եմ, որ այդ պրոցեսը կա: Սա լրջագույն խնդիր է, մանավանդ մի քիչ փոքր ընկերությունների համար, որոնք մտնում են շուկա, ավելի խոշորները կարողանում են կանխել մուտքը: Խնդրում եմ սա քննարկման առարկա դարձնել»,-ասաց պատգամավորը:
Մանուկյանը վստահեցրեց, որ խնդիրը կքննարկեն եւ ՊԵԿ ուշադրության կենտրոնում կպահեն. «Մեր համակարգը թույլ է տալիս ցանկացած ժամանակ պարզելու, թե՝ ո՞ր ծառայողն է մուտք գործել համակարգ, որ ընկերության տվյալներն է նայել: Ինքն ի պաշտոնե իրավունք ունի տվյալները նայել»:
Հարկային օրենսգրքում լրացում եւ փոփոխություն կատարելու մասին նախագիծը դրական եզրակացություն ստացավ, եւ որոշվեց որոշ տեխնիկական հարցերը շտկել:
Նելլի ԲԱԲԱՅԱՆ
