Մանվել Գրիգորյանի եւ Նազիկ Ամիրյանի գործով նախնական դատական նիստն էր Երեւանի ընդհանուր իրավասության դատարանում: Քննարկվում էր խափանման միջոց կալանավորման հիմնավոր լինել-չլինելու հարցը:
Նիստին ինքը՝ Մանվել Գրիգորյանը չէր մասնակցում: Ներկա էր Նազիկ Ամիրյանը՝ Գրիգորյանի կինը: Մեղադրող դատախազները, հակադարձելով պաշտպանական կողմի դիտարկումներին, թե Մանվել Գրիգորյանը մի շարք հիվանդություններ ունի, որոնք կալանքի հետ անհամատեղելի են, ասացին, որ քրեակատարողական հիմնարկից դուրս գալիս Մանվել Գրիգորյանը այդքան հիվանդի տեսք չուներ: Սա լսելուն պես՝ Նազիկ Ամիրյանը քմծիծաղ տվեց:
Քիչ առաջ նիստի ընդմիջմանը Aravot.am-ը Նազիկ Ամիրյանին հարցրեց՝ ինչո՞ւ քմծիծաղ տվեցիք, երբ ասացին, որ Մանվել Գրիգորյանը բավականին առողջ տեսք ուներ ՔԿՀ-ից դուրս գալիս: Նա պատասխանեց. «Հերոսը չի սողում»: Մենք ճշտեցինք՝ այսինքն, կուլ գնալով, մի կերպ ցավին դիմակայե՞լ է՝ Ամիրյանը պատասխանեց՝ կրկնելով. «Հերոսը չի սողում, եթե իրանց թվում է պետք է չորեքթաթ գնար, ուրեմն ավելի լավ, որ էդպես է գնում»:
Հարցին՝ հերոսի բնակարանում նման չափի զենք, զինվորի ուտելիքներ հայտնաբերելը նորմա՞լ է՝ նա արձագանքեց. «Իսկ ո՞վ է ասում: Շոուն սարքելը շատ հեշտ է, ապացույցները հետո կերեւան դատարանում: Շատ կներեք, էդ զենք-զինամթերքը բոլորն օրինական են»:
Կարդացեք նաև
Հարցերը՝ իսկ մեքենանե՞րը, իսկ դպրոցականների նամակների մասին ի՞նչ կասեք, իսկ «տուշոնկաները», զինվորի շապիկները, անշարժ գույքի վկայականները՝ նա թողեց անպատասխան: Հարցին՝ պատկերացնո՞ւմ էիք, որ նման կարգավիճակ եք ունենալու՝ մեղադրյալի՝ Նազիկ Ամիրյանը պատասխանեց. «Թուրքերի մոտ էլ եմ ունեցել»:
Հռիփսիմե ՋԵԲԵՋՅԱՆ
