Ուկրաինայի Գերագույն Ռադայի պատգամավոր Մուստաֆա Նայեմի մուտքը Հայաստան արգելվել է «երրորդ կողմի» պահանջով։ Այս մասին պատգամավորը հայտնել է Facebook-ի իր էջում։
Պատգամավորը նշել է, որ Երևան էր ժամանել Արևելաեվրոպական կենտրոնի հրավերով՝ մասնակցելու հակակոռուպցիոն մարմինների մեծ ֆորումին։
«Անձնագրային ստուգման կետում ներկայացրի սովորական անձնագիր, քանի որ այցը ծառայողական չէր, իսկ դիվանագիտական անձնագիրը չեմ չարաշահում։ Երկարատև ստուգումից հետո սպաները հայտնեցին, որ տվյալների բազայում նշված է մուտքի արգելք»,- գրել է պատգամավորը։
Ավելի ուշ պատգամավորին հայտնել են, որ արգելքը ոչ թե Հայաստանից է, այլ «երրորդ կողմի պահանջով։
Կարդացեք նաև
«Ես որևէ այլ այդպիսի երկիր չգիտեմ… ավելի ուշ պարզվեց, որ ես ճիշտ էի. Հայաստանում նման բան նախկինում տեղի է ունեցել մեր այլ քաղաքացիների նկատմամբ։ Արգելքները դրվում են Ռուսաստանի Դաշնության կողմից Հայաստանի սահմանային ծառայության բազաները Ռուսաստանի պատժամիջոցային ցուցակի հետ սինխրոնացնելու շրջանակում»,- գրել է Նայեմը։
Այնուամենայնիվ, հանգամանքները պարզելուց և դեսպանի միջամտությունից հետո պատգամավորին այցագիր տրամադրվել է «մեկանգամյա» նշումով։
Պատրաստեց Վիկտորյա ԱՆԴՐԵԱՍՅԱՆԸ
