«ԵԱՏՄ նոր մոդելի հեռանկարները, դրույքաչափերն ու դրանից բխող մարտահրավերները» թեմայով քննարկման ժամանակ «Իրազեկ քաղաքացիների միավորում» ՀԿ-ից Դանիել Իոաննիսյանն ասաց, որ ԵԱՏՄ-ին անդամակցելու արդյունքում 1700 ապրանքատեսակների մասով դրույքաչափերն ավելի ցածր են, 6300 ապրանքատեսակների մասով դրույքաչափերն արդեն բարձրացել են, մոտ 700 առավել կարեւորություն ունեցող ապրանքատեսակների մասով մաքսատուրքերը պետք է բարձրանան առաջիկայում. «Ներմուծվող ապրանքների թանկացումը սպառողների համար անխուսափելի է լինելու: Օրինակ, 2020-ից 7 տարուց հին մեքենա ներկրելիս քաղաքացիները վճարելու են ներքին այրման շարժիչով մեքենայի շարժիչի աշխատանքային ծավալի ամեն խորանարդ սանտիմետրի համար 1,6-2,2 եվրոյի չափ գումար՝ դրան գումարած բնօգտագործման վճարն ու ԱԱՀ-ն: Այս մաքսատուրքը մտնելու է ոչ թե ՀՀ-ի բյուջե, այլ՝ միության բյուջե ու դրանից Հայաստանը ստանալու է ընդամենը 1,22 տոկոսը: Այսինքն, սրանից անգամ չի կարելի ուրախանալ, որ բյուջետային մուտքերն են ավելանալու»:
Իոաննիսյանն ասաց, որ ավտոբուսների մաքսազերծումը նույնպես թանկանում է, սա նշանակում է, որ թանկանալու է հանրային տրանսպորտը: Այն գազելներով չի լինի այլեւս սպասարկել, իսկ «Բոգդանների» եւ մյուս ավտոբուսների մաքսազերծումը 10 տոկոսով բարձրանալու է:
Ավելի պատկերավոր ցույց տալու համար, թե կոնկրետ ավտոմեքենաների ներկրման մասով թանկացումը որքան է կազմելու՝ Իոաննիսյանն ասաց՝ 7 տարուց հին մեքենաները թանկանում են սարսափելի: 4 անգամ թանկանում են մինչեւ 7 տարվա մեքենաները, իսկ դրանից հինը՝ շատ. «Կարող է մարդիկ սկսեն ներմուծել ավելի նոր ու ցածրորակ մեքենաներ, ոչ թե հին ու լավ: Հիմա մարդիկ հզոր շարժիչով մեքենա չեն խորշում ներմուծել, արդեն կսկսեն փոքր շարժիչով մեքենա ներմուծել: Սա բնապահպանական առումով լավ է, բայց Հայաստանի պարագայում դրա էֆեկտը մեծ չի լինի, որովհետեւ բնական գազով են ՀՀ-ում վարում մեքենա հիմնականում»:
Հարցին՝ ի՞նչ է պատրաստվում անել իշխող ուժը, «Իմ քայլը դաշինքը, պատրաստվո՞ւմ եք մի բան անել, որ փոքր-ինչ շահած դուրս գա Հայաստանը, ո՞նց անել, որ սպառողի վրա բեռը նվազագույնի հասցվի՝ «Իմ քայլի» պատգամավոր Արմեն Փամբուխչյանը պատասխանեց. «Տեղի է ունենալու մաքսատուրքերի բարձրացում ինչ-որ մասով, բայց մեկ այլ ոլորտում՝ ադամանդագործության, ոսկերչության մասով փոխհատուցվելու է: Այնպիսի ապրանքներ են թանկանալու, որ կարող է խթանի, որ տեղում մենք արտադրենք, օրինակ, հավի միսը»:
Կարդացեք նաև
Նա ասաց, որ մեքենաների մասով անիմաստ է բանակցել, քանի որ ՀՀ-ն ստանձնել է այդ պարտավորությունը եւ հիմա չստացվի, որ խուսափում է: Փամբուխչյանը նշեց, որ գուցե մեկ այլ ապրանքատեսակ գտնեն՝ առաջին անհրաժեշտության ապրանք ու դրա հետ կապված ԵԱՏՄ-ում բանակցեն:
Հռիփսիմե ՋԵԲԵՋՅԱՆ
