Քիչ առաջ ՀՀ Քրեական Վերաքննիչ դատարանը մերժեց «Սպայկա» ՍՊԸ հիմնադիր-գլխավոր տնօրեն Դավիթ Ղազարյանի պաշտպանական խմբի բողոքը: Մերժվեց նաև պաշտպանական խմբի միջնորդությունը՝ կալանքը գրավով փոխարինելու վերաբերյալ: Վերաքննիչ դատարանն ուժի մեջ թողեց առաջին ատյանի դատարանի որոշումը:
Դավիթ Ղազարյանի պաշտպան Արսեն Սարդարյանը լրագրողների հետ զրույցում նշեց՝ այս դատական ակտի հետ համաձայն չեն և պատրաստվում են ասուլիս տալ:
Հիշեցնենք՝ ապրիլի 8-ին Դավիթ Ղազարյանը կալանավորվեց: ՊԵԿ քննչական վարչության կողմից կոռուպցիոն բնույթի հանցագործությունների բացահայտման ուղղությամբ ձեռնարկված անհետաձգելի օպերատիվ-հետախուզական և քննչական միջոցառումների արդյունքում բացահայտվել էր առանձնապես խոշոր չափերով հարկերը չվճարելու դեպք: Ըստ ՊԵԿ-ի՝ հանրորեն վտանգավոր արարքը կատարելու համար 2019թ. ապրիլի 4-ին Դավիթ Վենգերի Ղազարյանին («Սպայկայի» տնօրեն) մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասով:
Եվրասիական զարգացման բանկը հետաձգել է «Սպայկա» ընկերության վարկավորմանն ուղղված ծրագրի իրականացումը: Այս մասին ապրիլի 25-ին Եվրասիական ԶԼՄ-ների երկրորդ Կոնգրեսում EADaily-ի թղթակցին ասել է ԵԱԶԲ-ի նախագահ Անդրեյ Բելյանինովը. «Այնտեղ պահանջներ կան հարկերի վճարման հետ կապված, ուստի մենք դեռ կասեցնում ենք: Մեզ մոտ ամեն ինչ պատրաստ է, սակայն «Սպայկայի» մասով կասեցվել է: Մենք չենք կարող ռիսկի դիմել, եթե խոսքը հնարավոր սնանկության մասին է»: ԵԱԶԲ-ն նախատեսում էր «Սպայկային» 67 միլիոն դոլարի վարկ տրամադրել՝ գյուղատնտեսության ոլորտում խոշոր ծրագրի իրականացման համար:
Կարդացեք նաև
Դավիթ Ղազարյանի պաշտպանն ասաց, որ չէին սպասում նման որոշման. «Այս որոշումը գնահատում ենք որպես գործարարից գումար կորզելու մեխանիզմ: Ստացվում է՝ պաշտպանական կողմն ասում է՝ կա հաշվարկված ենթադրյալ չվճարված հարկ և այդ հաշվարկն իրականացնում է վարույթն իրականացնող մարմնի կողմից կազմված տեղեկանքի հիման վրա, որն ուղարկվել է փորձագետների: Այս գործընթացին մեր պաշտպանական թիմը չի եղել, մեր աուդիտոր հաշվապահները չեն ներգրավվել, որ հասկանանք՝ իրականում պետությանը չվճարված գումար առկա՞ է, թե՞ ոչ: Այս պայմաններում ասվում է, որ ձեր ազատության մեջ մնալու դեպքում կխոչընդոտի քննությանը: Մեր պահանջը, որ փորձաքննությանը պետք է ներկա լինենք, մեր փաստարկները ներկայացնենք, մեր ֆինանսիստների դիրքորոշումն արտահայտվի, դա ներկայացվում է որպես քննությանը խոչընդոտելու ռիսկ: Որևէ տվյալ, որ պարոն Ղազարյանը քննությանը խոչընդոտել է, չի ներկայացվում, և դատախազն ընդունում է այդ փաստը: Միայն վերացական դատողություն է իրականացվում, որ ընկերության ղեկավարը հեղինակություն է և նաև հեղինակությունը կարող է ազդել: Ոչ միայն կալանքի հիմքերն են բացակայում, այլև Դավիթ Ղազարյանին՝ կալանքի տակ պահելը լուրջ տնտեսական ճգնաժամի կարող է հանգեցնել: Գործընկերները նրա հետ են աշխատում, նրա բիզնես վարելու ունակություններն են բիզնեսն այդ մակարդակի բարձրացրել, նրա կալանավորումը կարող է ծանր հետևանքներ առաջացնել»:
Տաթև ՀԱՐՈՒԹՅՈՒՆՅԱՆ
