Հարությունից Պենտեկոստե ընկած հիսնօրյա շրջանը Հայ առաքելական եկեղեցին կոչում է Հինունք կամ Հինանց շրջան՝ նվիրված Տիրոջ Հարության և Համբարձման խորհուրդներին:
Հայ առաքելական եկեղեցին այսօր նշեց Հինանց շրջանի առաջին կիրակին՝ Կրկնազատիկը: Արդեն 16 տարի յուրաքանչյուր Կրկնազատկին Մատենադարանում պահվող Շուրիշկանի խնդրակատար Ավետարանը ուխտավորների մեծ թափորի ուղեկցությամբ Մատենադարանից տարվում է Արագածոտնի թեմի Մուղնու Սբ. Գևորգ եկեղեցի։
Տոնի առթիվ Սբ. Գևորգ եկեղեցում մատուցվեց պատարագ: Պատարագիչ քահանա Զաքարիա Ծայրագույն վարդապետ Բաղումյանը իր քարոզում կարևորեց հավատը ՝ առ Քրիստոս, շնորհավորեց հավատացյալներին և մաղթեց, որ Նոր Կիրակին նորոգություններ բերի ամենքի հոգում:
«Զորավոր է Ավետարանը, այո՛, բայց դրա զորությունը միայն հպումը չէ: Հավատք է պետք ունենալ, որն էլ կմղի Ավետարան կարդալուն»։
Կարդացեք նաև
Շուրիշկանի Ավետարանն այդպես է կոչվել համանուն՝ Շուրիշկան գյուղում գտնվելու պատճառով, իսկ հայտնվել է այդ գյուղում 1603-1604 թթ. պարսկա-թուրքական պատերազմի ընթացքում:
Շուրիշկանում, հայությունը քոչվորների հարձակումներից պաշտպանվելու ժամանակ Ավետարանի անվտանգությունն ապահովելու նպատակով այն թաղել է Սուրբ Բարսեղ Կեսարացու վանքի տարածքում։ 7 տարի շարունակ հող ու ջրի տակ մնացած Ավետարանը պահպանվել է անվնաս կերպով։ Շուրիշկանում այսօր հայ բնակչություն այլևս չկա, սակայն ուխտավորների շարքերում կարելի է հանդիպել բնիկ շուրիշկանցիների, որոնք ոչ միայն հավատ են տածում Ավետարանի նկատմամբ, այլ նաև Ավետարանը համարում են իրենց էության մի մասը:
Շուրիշկանում ծնված Արշակյան Շողիկը, պատմում է, որ գյուղը մշտապես լի էր լինում ուխտավորներով:
«Օրերով գալիս էին մնում եկեղեցում, գիշերում մատուռներում: Իսլամիստների համար էլ Շուրիշկանը սուրբ էր և չկար մեկը ում հավատով արված խնդրանքը չկատարվեր: Աղջիկներով հերթափոխ ունեինք եկեղեցին մաքրելու, այսօրը կարծես մեր գյուղի վերածնունդը լինի իմ հոգում…»
Սուրբ պատարագի ընթացքում յուրաքանչյուր ուխտավոր Ավետարանի հրաշագործ զորությանը առնչվելու հնարավորություն ունի;
7 տարի տարի առաջ Ռազմիկ Գևորգյանին բժիշկները կանխորոշել էին չարորակ ուռուցք, Ավետարանին հպվելուց հետո բժշկի այլևս չի գնացել:
«Հիվանդանոցից դեռ տուն չէինք հասել, երբ իմացա,որ նման ավետարան կա և հենց այդ օրն էլ դուրս է բերվել: Կինս տաքսի կանչեց, չէի էլ կարողանում քայլել, մի կերպ եկեղեցի հասանք, քահանան բժշկության աղոթք արեց, երեք ժամ հետո ես չէի էլ հիշում, որ չէի կարողանում ցավերից իրար գալ… 7 տարիների ընթացքում ամեն Կրկնազատկի գալիս եմ շնորհակալությունս հայտնում»։
Ավետարանը Մուղնու Սբ. Գևորգ եկեղեցում կլինի մինչև երեկո, այն մշտական ցուցադրության է դրված նաև Մատենադարանում:
Զարա ՂԱԶԱՐՅԱՆ
