Հասարակական գործիչ Վարդգես Գասպարին Մաշտոցի պուրակում, որտեղ տեղի էին ունենում Քաղաքացու օրվա առիթով կազմակերպած միջոցառումները, և քննարկվում էր քաղաքացու իրազեկ լինելու հարցը, կառավարության անդամներին և ԱԺ պատգամավորներին ասաց` նախկին իշխանությունները չեն պրծել ձեռքիցս, դուք էլ չեք պրծնելու։
Ապա պարոն Գասպարին, դիմելով ԱԺ պատգամավոր Հայկ Կոնջորյանին, ասաց, որ ԱԺ տարբեր հանձնաժողովներին հարց է ուղղել՝ ընդհանրապես չեն էլ պատասխանել. «Չեն էլ ասում` համաձայն են, համաձայն չեն, ասում եմ լավ, մարդիկ են, սովոր չեն ազգային ժողովի իրենց «իմեյլը» ստուգեն, մի հատ էլ ֆեյսբուքով եմ գրում։ Երբ որ խոսքը վերաբերում է հումորներին, արձագանքում են, բայց իմ հարցերին չեք պատասխանում»։
Ասաց, որ հարցեր է գրել պետաիրավական և տնտեսական հանձնաժողովներին, բայց պատասխան չի ստացել։ Ասաց, որ երբ դիմում է ԵԱՏՄ գնումներին մասնակցելու, ասում են` մի կազմակերպություն գրանցեք Ռուսաստանում, որ նրանից գնումն անեն. «Այսինքն` նրանք մեզ չեն համարում մաքսային տարածք, ընդհանուր տնտեսական տարածք»։
Հանձնաժողովն, ըստ Գասպարիի, մակագրել է ՊԵԿ ղեկավարին, որն իր պատասխանում օրենսդրությունն է բացատրել։ «Հարգելիներս, ուզո՞ւմ եք այդ օրենսդրությունը ես ձեզնից լավ բացատրեմ, ես ասում եմ՝ դա չի կիրառվում։ Դուք հեքիաթ եք գրում, ուզում եմ ասել, եթե պատասխանում էլ են, զուտ «պտիչկա» դնելու հարց է։ Նույնը` ավագանիին։ Ցավոք սրտի, ես տեսնում եմ այն խզումը, որը տարին չբոլորած, իշխանությունն ունի քաղաքացիների հետ»։
Կարդացեք նաև
Հայկ Կոնջորյանն ասաց, որ նախ շնորհակալություն է հայտնում պարոն Գասպարիին «պահանջատեր քաղաքացու մաստեր կլասի համար», որն այսօր արեց, ապա Գասպարիին հրավիրեց եկող շաբաթ ԱԺ` հանդիպելու տվյալ հանձնաժողովների ղեկավարների հետ և հարցադրումներն անելու. «Կարծում եմ, քաղաքացու կապը ազգային ժողովի հետ չպետք է սահմանափակվի միայն նամակագրությամբ և «պտիչկա» դնելու տրամաբանությամբ»։
Լուսինե ԲՈւԴԱՂՅԱՆ
