Այս օրերին Երեւանում էին Ֆրանսիայի «Մեծ Արեւելք» մասոնական օթյակի մի խումբ անդամներ՝
«Մեծ Արևելքի» խորհրդի անդամ, Եվրոպայի գծով հարցերի պատասխանատու Էղվե Զաքարյանի գլխավորությամբ:
Aravot.am-ը պարոն Զաքարյանից, որը ծաղկեպսակ դրեց Ծիծեռնակաբերդում, հարցրեց՝ չի՞ կարծում, որ ժամանակն է, որ Թուրքիան վերանայի իր մոտեցումները պատմական արդարությունը վերականգնելու համար, արդյոք «Մեծ Արեւելք» -ը նման հորդորով դիմո՞ւմ է օթյակի թուրք անդամներին:
«Մենք չենք հասկանում, որ Թուրքիան, չնայած որպես մեծ տերություն ընկալված լինելու ցանկությանը, դեռևս շարունակում է խեղաթյուրել պատմությունը:
Ցավոք, կան պատմական իրողություններ, որոնք երբեք հնարավոր չէ ջնջել: Ժամանակն է, որ Թուրքիան առերեսվի իր անցյալի հետ:
Ֆրանսիայի «Մեծ Արևելք» մասոնական օթյակը աշխատանքներ է տանում այս ուղղությամբ, քանի որ մասոնության հիմքերից մեկն արդարության հաստատումն է: Մեր պատվիրակության ներկայությունը այստեղ դրա վկայությունն է: Մասոնությունը ունիվերսալ է, և մենք իհարկե ունենք հարաբերություններ մեր թուրք եղբայրների հետ»,- ասաց Էղվե Զաքարյանը:
Այլ հարցերի մասին Էղվե Զաքարյանի զրույցը՝ ավելի ուշ:
Գոհար ՀԱԿՈԲՅԱՆ
