«Այդ հայտարարությամբ Էրդողանը նաեւ ցույց տվեց, որ ինքը զգայուն է ապրիլի 24-ի հանդեպ»,-ՀՀ-ում Ֆրանսիայի դեսպանատանն այսօր լրագրողների հետ ճեպազրույցում անդրադառնալով Թուրքիայի նախագահ Ռեջեփ Թայիփ Էրդողանի ապրիլի 24-ի հայտարարությանն այն մասին, որ 1915թ.-ին տեղահանվել են մահմեդական կանանց եւ երեխաներին իբրեւ թե սպանած հայերը, ասաց Լիոնի քաղաքապետի առաջին տեղակալ Ժորժ Կեպենեկյանը։
Նրա բնորոշմամբ` անգամ եթե Էրդողանը հայոց ցեղասպանության մասին վիրավորական արտահայտություններ կամ գռեհկության հասնող հայտարարություններ է անում, միեւնույնն է, նա զգայուն է ապրիլի 24-ի նկատմամբ. «Նա շատ լավ գիտակցում է, որ 1915-ին իրադարձություններ են տեղի ունեցել։ Էրդողանի հայտարարությունը հիմք ընդունելով` միջազգային հանրությունը պետք է հաշվի առնի, որ եթե մինչ այդ հույսեր կային խնդրի շուրջ զրուցելու եւ բանակցելու, ապա հիմա այդ գործընթացը ժամանակ է պահանջում։ Բանակցելու համար 2 կողմ պետք է լինի, մինչդեռ Էրդողանը մնում է փակված իր աշտարակում»:
Լուիզա ՍՈՒՔԻԱՍՅԱՆ
