Այսօր Երեւանի մետրոպոլիտենում ֆուտբոլային դիզայնով առաջին գնացքի ուղերթին մասնակցեց նաեւ օլիմպիական խաղերի արծաթե մեդալակիր, աշխարհի ու Եվրոպայի չեմպիոն, ըմբիշ, ՀՀ ԱԺ պատգամավոր Արսեն Ջուլֆալակյանը: Նա շատ էր ոգեւորված:
Aravot.am-ին ճանաչված մարզիկն ասաց. «Հայաստանում անհրաժեշտ է ամենատարբեր մարզաձեւերից միջազգային մրցաշարեր կազմակերպել տարբեր առումներով: Նախ, այդպիսի յուրաքանչյուր մրցաշար հանդիսատեսի համար վերածվում է տոնի, ու Եվրոպայի այս առաջնությունը հենց այդպիսին էլ լինելու է: Ուստի հայ ֆուտբոլասերին հորդորում եմ այդ օրերին հաճույք ստանալ ոչ միայն Հայաստանի հավաքականի խաղից, այլ ֆուտբոլից ընդհանրապես:
Երկրորդ, այս միջոցառումը առողջ ապրելակերպի քարոզ է, երիտասարդ սերնդի համար մոտիվացիա՝ զբաղվելու սպորտով: Սա մեր երկրում ֆուտբոլի զարգացման մի նոր հարթակ է, որ տեսնենք՝ ինչի ենք ընդունակ, դեպի ուր պետք է շարժվենք եւ ինչպես շարժվենք:
Եվ երրորդ՝ երկիրը ճանաչելի է դառնում, ամբողջ աշխարհից ունենում ենք բազմաթիվ հյուրեր: Այսինքն, ֆուտբոլի մինչեւ 19 տարեկանների Եվրոպայի առաջնությունը Երեւանում անցկացնելը բոլոր առումներով դրական եմ գնահատում»:
Կարդացեք նաև
Աշոտ ՀԱԿՈԲՅԱՆ
