Այն պահից, երբ ատոմակայանն ամբողջությամբ կվերազինվի, հնարավորություն կլինի վերանայել էլեկտրաէներգիայի գինը՝ նվազեցնելով այն: Այս մասին այսօր ԱԺ տարածաշրջանային եւ եվրասիական ինտեգրման հարցերի հանձնաժողովի նիստում հայտարարեց Հանրային ծառայությունները կարգավորող հանձնաժողովի նախագահ Գարեգին Բաղրամյանը: Նա ներկայացնում էր զեկույց` ԵԱՏՄ-ի միասնական էներգետիկ շուկայի ձեւավորման վերաբերյալ:
Հանձնաժողովի նախագահ Միքայել Մելքումյանը հետաքրքրվեց էլեկտրաէներգիայի սակագնի նվազեցման հնարավորություններից եւ արդյոք ԵԱՏՄ միասնական շուկայում էժան գազի ձեռքբերումը հնարավորություն կտա վերանայել սահմանին`Հայաստանին մատակարարվող գազի գինը:
Գարեգին Բաղրամյանն ասաց, որ ԱԷԿ-ի վերազինման աշխատանքների ավարտը նախատեսված է 2020-21 թվականներին: Միաժամանակ սկսվելու է վարկի մարումը, բայց նա կարծում է, որ դա հավելյալ բեռ չի լինի: Բացի այդ, նաեւ 2021-ին ԲԷՑ-երում կավարտվեն փոփոխությունները, թեեւ կորուստները արդեն նվազեցվել են, կրճատումներ են ընթանում: Առաջիկա մեկ-երկու ամիսների ընթացքում նախատեսվում է ՀԷՑ-երի սակագնային մարժայի տրոհում երկու մասի:
Սրանք բոլորը դրական գործոններ են էլեկտրաէներգիայի սակագնի վերանայման եւ նվազեցման համար, բայց այս պահին Գարեգին Բաղրամյանը թվային տվյալներ ներկայացնել չի ցանկանում:
Կարդացեք նաև
«Ռիսկերը կառավարվում են, սողացող կրճատումներ են լինում, շատ-շատ լավ բաներ եք ներկայացնում, բայց հընթացս այնքան նեգատիվ է առաջանում, որ չեզոքացնում է»,-հեգնեց Միքայել Մելքումյանը:
Այլ մանրամասները` տեսանյութում
Խոսելով ԵԱՏՄ-ի ընդհանուր էներգետիկ շուկայի ընձեռող հնարավորությունների մասին էլ, Գարեգին Բաղրամյանն ասաց, որ այն հնարավորություն է տալու էժան սակագնով էներգակիրներ կամ գազ ձեռք բերել ԵԱՏՄ տարածքում: Տարանցումը այդ պարագայում պետք է իրականացվի նույն պայմաններով, քանի որ փոխանցման համակարգերը ԵԱՏՄ համակարգում բնական մենաշնորհ են եւ բոլոր հինգ երկրներին հավասար հնարավորություն է տրվում դրանից օգտվելու:
Նելլի ԳՐԻԳՈՐՅԱՆ
