Երեկ առաջին անգամ Հայաստանի պատմության մեջ մեր երկրում կատարվել է լյարդի փոխպատվաստում: Այս մասին կառավարության նիստում ասաց առողջապահության նախարար Արսեն Թորոսյանը՝ նշելով, որ փոխպատվաստումը կատարվել է կենդանի դոնորից: Նախարարի խոսքով, այնքան շատ կարեւոր բժշկական իրադարձություն է, որ ցանկացավ այդ մասին հայտնել:
Վարչապետի զարմացած հարցին ի պատասխան՝ կենդանի դոնորի՞ց, նախարարը բացատրեց, որ փոխպատվաստումը կատարվել է աղջկանից մորը՝ լյարդից վերցնելով մի կտոր: Ասաց, որ վիրահատությունը կատարվել է «Աստղիկ» բժշկական կենտրոնում՝ ռուս գործընկերների հետ համատեղ ու աջակցությամբ: Արսեն Թորոսյանի խոսքով այդ ուղղությունը զարգացնելու են, եւ շատ կարիք ունեն երիկամի փոխպատվաստման նաեւ՝ լյարդի: Նախարարն ասաց, որ եկող տարվա բյուջեում ծրագրում են այդ վիրահատությունների համար գումարներ նախատեսել, որպեսզի կարողանան մեր քաղաքացիներին աջակցել:
Արսեն Թորոսյանի տվյալներով, կոնկրետ լյարդի փոխպատվաստման վիրահատությունը արժե 100 հազար դոլարի շրջանակներում է:
https://www.facebook.com/ATorosyanOfficial/videos/312397342763006/
Լուսինե ԲՈՒԴԱՂՅԱՆ
