«Հայ-թուրքական սահմանի բացումն այլընտրանք չունի: Վաղ թե ուշ պետք է հասնել դրան: Փորձը ցույց տվեց, որ առանց նախապայմանների սահմանը բացելու եւ հարաբերություններ սկսելու վերաբերյալ մեր պատրաստակամությունը չաշխատեց»,-«Ծիծեռնակաբերդ»-ում լրագրողների հետ զրույցում այսօր հայտարարեց «Լուսավոր Հայաստան» կուսակցության ղեկավար Էդմոն Մարուքյանը: Նրա խոսքով՝ հիմա էլ է հնարավոր ասել, որ առանց նախապայմանների՝ կարելի է Թուրքիայի հետ հարաբերություններ սկսել, բայց դա չի կարող ծառայել միայն թուրքական կողմին. «Կարծում եմ՝ սահմանը պետք է բացվի առանց նախապայմանների, ինչից հետո միայն հնարավոր է խոսել խնդիրների մասին»:
Ինչ վերաբերում է փաստին, որ ՀՀ-ի հետ հարաբերությունների վերսկսումը Թուրքիան կապում է Արցախի խնդրի հետ եւ այդ համատեքստում նախապայմաններ առաջադրում հայկական կողմին, Մարուքյանը նշեց. «Զարմանում եմ, որ դա ժամանակին չէին կանխատեսել, եւ մտածում էին, թե այդքան հեշտ կարելի է հասնել խնդրի լուծմանը»: Էդմոն Մարուքյանը նաեւ համոզմունք հայտնեց, որ ՀՀ նոր իշխանությունը Թուրքիայի հետ հարաբերություններ ձեւավորելու հարցում տեսլական չի ներկայացրել. «Այդ ուղղությամբ հիմա որեւէ քայլ չի կատարվում: Մեր տեսլականն այն է, որ պետք է սկսել խոսել սահմանի բացման մասին, վերականգնել մարդկային շփումները, հետո քննարկել կնճռոտ հարցերը»:
Լուիզա ՍՈՒՔԻԱՍՅԱՆ
Կարդացեք նաև
