ՀՀ արտաքին գործերի նախարար Զոհրաբ Մնացականյանը որեւէ կերպ չի կարողանում հասկանալ, թե հայոց ցեղասպանությունից 100 տարի անց ինչո՞վ է պայմանավորված Թուրքիայի ժխտողականությունը: Թուրքիայի ամենամեծ խնդիրը Հայաստանի արտաքին գերատեսչության ղեկավարը համարում է այն, որ անգամ 100 տարի անց թուրքական իշխանությունները համարձակություն չեն դրսեւորում իրենց պատմության հետ առերեսվելու: Թուրքիայի այդ խնդիրը նա նաեւ պատգամ է համարում հայերի համար այն առումով, որ մենք՝ իբրեւ ժողովուրդ, հաղթահարել ենք ցեղասպանությունը:
Լրագրողները հետաքրքրվեցին՝ հնարավոր համարո՞ւմ է Զոհրաբ Մնացականյանը, որ Երեւանն ու Անկարան «ֆուտբոլային» տապալված դիվանագիտությունից հետո հաշտեցման նոր գործընթաց սկսեն: Զոհրաբ Մնացականյանն ասաց. «Դժբախտաբար պաշտոնական Անկարայից եկող լուրերը հուսադրող չեն»: Նա եւս մեկ անգամ հստակեցրեց՝ ցեղասպանության ճանաչումը երբեւէ Հայաստանը նախապայման չի դիտարկել հայ-թուրքական հարաբերությունների հաշտեցման համար:
Նելլի ԳՐԻԳՈՐՅԱՆ
