ՀՀ ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը եւ ԱԺ արտաքին հարաբերությունների մշտական հանձնաժողովի անդամ Տաթեւիկ Հայրապետյանն ապրիլի 22-ին հանդիպել են Գերմանիայի «Ընդդեմ ցեղասպանության միություն» կազմակերպության անդամների հետ:
Ողջունելով հյուրերին խորհրդարանում՝ Վլադիմիր Վարդանյանը կարեւորել է կազմակերպության ջանքերը Թուրքիայի կողմից Հայոց ցեղասպանության ճանաչման գործում: Ըստ մշտական հանձնաժողովի նախագահի՝ ցեղասպանության հիմքում ընկած է մարդատյացությունը, ինչի դեմ նա կարեւոր է համարել ամենօրյա պայքար ծավալելը: «1930-1940 թվականներին Գերմանիան զարգացած, քաղաքակիրթ երկիր էր, սակայն մարդատյացության քարոզի հետեւանքով տեղի ունեցավ Հոլոքոստը»,-ասել է պատգամավորը: Բանախոսը նշել է, որ ցեղասպանության ճանաչումը եւ անցյալի հետ առերեսվելը թուրք ժողովրդի համար կարեւոր գրավական է կառուցելու արդար ու ժողովրդավարական պետություն: Նրա խոսքով` 21-րդ դարում հնարավոր չէ ապրել հանգիստ խղճով` չառերեսվելով սեփական պատմության հետ:
«Ընդդեմ ցեղասպանության միություն» կազմակերպության նախագահ Ալի Էրթեմը նշել է, որ իրենց կառույցը պայքարում է արդարության վերականգնման համար:
«20 տարի շարունակ մենք պայքարում ենք, որպեսզի Թուրքիան ճանաչի Հայոց ցեղասպանությունը: Այդ հարցը փորձում ենք պահել Թուրքիայի օրակարգում»,-ասել է նա: Կազմակերպության նախագահի խոսքով` իրենք պայքարում են նաեւ Փոքր Ասիայի տարածքում ցեղասպանության ենթարկված պոնտոսի հույների, ասորիների, եզդիների եւ այլ ժողովուրդների արդար դատի վերականգնման համար: Թուրք իրավապաշտպանը հավաստիացրել է, որ իրենց պայքարը շարունակական է լինելու:
Կարդացեք նաև
Տաթեւիկ Հայրապետյանն իր երախտագիտություն է հայտնել կազմակերպության անդամներին, կարեւորել նրանց առաքելությունը Հայոց ցեղասպանության ճանաչման գործում: Նա նաեւ տեղեկացրել է, որ ուսանողական տարիներին գործակցել են գերմանացի եւ թուրք ուսանողների հետ ցեղասպանության խնդիրների շուրջ, արդյունքում ստեղծվել է «Մուշ քաղցր Մուշ» եռալեզու գիրքը:
Հանդիպմանը ներկա են եղել գերմանացի տարբեր տարիքի դպրոցականներ: Կազմակերպության նախագահը նշել է, որ նոր սերունդը պետք է իմանա ողջ ճշմարտությունը Հայոց ցեղասպանության մասին: Ապրիլի 24-ին նրանք այցելելու են Ծիծեռնակաբերդի հուշահամալիր, մասնակցելու ջահերով երթին:
Հանդիպման ավարտին Ալի Էրթեմը Հայոց ցեղասպանության վերաբերյալ գերմանալեզու գիրք եւ մեծադիր լուսանկարներ է նվիրել մշտական հանձնաժողովի նախագահին:
ՀՀ Ազգային ժողով
