2018թ. մայիսից հետո՝ ՀՀ-ում տեղի ունեցած իշխանափոխության արդյունքում, հեռուստաընկերություններն իշխանությունների միջամտությունից անկախ են եւ ազատ: Այս մասին այսօր պատգամավորների հետ հարցուպատասխանի ժամանակ հայտարարեց Հեռուստատեսության եւ ռադիոյի հանձնաժողովի նախագահ Տիգրան Հակոբյանը:
Նա միաժամանակ շեշտեց. «Բայց ասվածը հեռարձակողներին զերծ չի պահում այլ տեսակի միջամտություններից, որոնց դժվար է հետեւել: Խոսքը գովազդատուների, եւ, կոպիտ է հնչում, «փայատերերի» միջամտության մասին է, որը ՀՌՀ-ի տիրույթում չէ, եթե, իհարկե, հեռուստաընկերության տնօրենը չդիմի եւ չասի, որ իրեն ճնշում են»:
ՀՌՀ նախագահի խոսքով՝ մարզային հեռուստաընկերություններն էլ այլեւս ազատ են, բայց իրենց դեպքում էլ ֆինանսավորման խնդիր կա. «Պատճառը ոչ միայն հին ուժերից ազատվելն է, այլեւ տեխնիկական առաջընթացը: Վերազինում է պետք: Մարզային հեռուստաընկերությունների պարագայում կան վատ մենեջմենթ կամ տնտեսական գիտելիքների պակաս»:
Լուիզա ՍՈՒՔԻԱՍՅԱՆ
