«Թուրքական եւ ադրբեջանական ռադիոն հասանելի է ՀՀ սահմանամերձ համայնքների բնակիչներին: Ինչպե՞ս է հնարավոր արգելափակել այդ ռադիոալիքները եւ մեր բնակիչների համար հասանելի դարձնել հայալեզու հաղորդումները»,-ԱԺ նիստում այսօր Հեռուստատեսության եւ ռադիոյի հանձնաժողովի նախագահ Տիգրան Հակոբյանին նման հարց ուղղեց «Իմ քայլը» խմբակցության պատգամավոր, Կրթության եւ գիտության նախկին փոխնախարար Հովհաննես Հովհաննիսյանը: Տիգրան Հակոբյանը պատասխանեց, որ օտարալեզու ռադիոալիքների արգելափակումը ՀՌԱՀ գործառույթների տիրույթում չէ, բայց հանձնաժողովին ուղղված բողոքները շատ են:
«Քաղաքացիները մեզ շատ են բողոքում, որ օտարալեզու՝ ադրբեջանական, թուրքական եւ իրանական ռադիոծրագրեր են հասանելի: Դա նաեւ հեռուստաալիքներին է վերաբերում: Տավուշի մարզպետի հետ հանդիպել եմ, որպեսզի խնդիրը կարողանանք լուծել: Օրենքով պետք է ամրագրվի, որ ամեն մարզ ունենա ռադիո եւ հեռուստատեսություն: Տավուշում, օրինակ, որեւէ ռադիո կամ հեռուստաալիք չկա»,-եզրափակեց Տիգրան Հակոբյանը:
Լուիզա ՍՈՒՔԻԱՍՅԱՆ
