ՀՀ ԱԺ-ն այսօր քննարկեց «Տեղեկատվական տեխնոլոգիաների ոլորտի պետական աջակցության» մասին օրենքում փոփոխություններ կատարելու մասին օրենքի նախագիծը երկրորդ ընթերցմամբ եւ ամբողջությամբ ընդունելու հարցը: Ինչպես նախագծի առաջին ընթերցման ժամանակ հայտարարել էր ՀՀ Տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը, օրենքի նախագիծը հարկային արտոնություններ է սահմանում ինչպես տեղական սկսնակ, այնպես էլ օտարերկրյա ՏՏ ընկերությունների հայաստանյան դուստր կազմակերպությունների համար, ինչը, ըստ կառավարության, կնպաստի միջազգային ընկերությունների ներդրումների ներգրավմանը: Այսօր, սակայն, Հակոբ Արշակյանը հայտարարեց, որ նշյալ դրույթը հանվել է առաջինից երկրորդ ընթերցման ժամանակահատվածում, եւ դա «Լուսավոր Հայաստան» խմբակցության առաջարկն էր:
Խմբակցության պատգամավորները բարձրաձայնել էին իրենց դիմած ՏՏ ոլորտի ներկայացուցիչների մտահոգություններն օրենքի այդ դրույթի վերաբերյալ: ԼՀԿ պատգամավոր Գեւորգ Գորգիսյանն արձանագրեց, որ, այսպիսով` օրենքի նախագծից հանվել է խնդրահարույց դրույթը, որը վերաբերում էր օտարերկրյա ընկերություններին եւս հարկային արտոնություններ տալուն. «Այս կերպ կկարողանանք փոխզսպել օտարերկրյա խաղացողների մուտքը ՀՀ: Մեր մյուս առաջարկը մերժվել է, սակայն այն կարող էր դրական ուղերձ լինել: Մենք պնդում էինք, որ բարձր տեխնոլոգիաները մշտապես պետք է լինեն կառավարության ուշադրության կենտրոնում, ոչ թե մինչեւ 2022թ.-ը, ինչպես նախագիծն է սահմանում»: Նախարար Հակոբ Արշակյանը հակադարձեց՝ ասելով, որ ոլորտը մշտապես ուշադրության կենտրոնում է լինելու Բարձր տեխնոլոգիաների նախարարության միջոցով:
Լուիզա ՍՈՒՔԻԱՍՅԱՆ
