Այսօր դատական նիստից հետո, որի ընթացքում դատարանը կրկին մերժեց ԱԺ նախկին պատգամավոր, ԵԿՄ նախկին նախագահ Մանվել Գրիգորյանին 10 միլիոն դրամ գրավի դիմաց ազատ արձակելու նրա պաշտպանների միջնորդությունը, նրա պաշտպան Արսեն Մկրտչյանը հայտնեց, որ Մանվել Գրիգորյանը շարունակում է մնալ քաղաքացիական հիվանդանոցում:
Ինչ վերաբերում է Մանվել Գրիգորյանի պաշտպանների՝ Մարդու իրավունքների եվրոպական դատարան՝ ՄԻԵԴ ուղարկած գանգատին, ապա Արսեն Մկրտչյանն ասաց, որ իրենք դիմել էին ՄԻԵԴ, որպեսզի անհապաղ տեղափոխեն քաղաքացիական հիվանդանոց եւ պահանջի հիմնական մեխը դա է եղել. «Եվ, ՄԻԵԴ-ի պատասխանը ստանալու օրվա ժամանակահատվածում պետությունը Մանվել Գրիգորյանին տեղափոխել է հիվանդանոց: Այսինքն՝ հիմնական պահանջը կատարվել է: Երկրորդ պահանջը՝ հետազոտությունները անցկացնելու համար էր, պետությունը դիրքորոշում է հայտնել՝ ունի այդ հնարավորությունը: Եթե կունենա՝ փառքդ շատ: Այսինքն՝ այն հետազոտությունը, որը մենք ասել ենք Հայաստանում հնարավոր չէ իրականացնել, պետության ներկայացուցիչը հավաստիացնում, որ հնարավոր է»:
Պաշտպանը նաեւ ասաց, որ Մանվել Գրիգորյանի հիմնական հետազոտությունը կատարվել է, եւ այս պահին բժիշկները որոշում են Ֆրանսիա տեղափոխելու անհրաժեշտություն կա թե՝ չկա:
Եթե անհրաժեշտություն առաջանա, ըստ պարոն Մկրտչյանի, գուցե գործը քննող նոր դատարանը թույլատրի, եւ ՄԻԵԴ դիմելու անհրաժեշտություն չառաջանա:
Կարդացեք նաև
Լուսինե ԲՈՒԴԱՂՅԱՆ
