Այսօր կեսօրին Երեւանի ընդհանուր իրավասության դատարանի Շենգավիթի նստավայրում դատարանը հրապարակեց ԱԺ նախկին պատգամավոր, ԵԿՄ նախկին նախագահ Մանվել Գրիգորյանի փաստաբանների միջնորդության վերաբերյալ իր որոշումը: Նիստը տեղի էր ունեցել անցած ուրբաթ օրը՝ ապրիլի 19-ին, սակայն վճիռը հրապարակվեց այսօր: Դատավոր Մարինե Մելքոնյանը մերժեց Մանվել Գրիգորյանին 10 միլիոն դրամ գրավի դիմաց ազատ արձակելու Գրիգորյանի պաշտպանների միջնորդությունը:
Մանվել Գրիգորյանի պաշտպանն Արսեն Մկրտչյանը նիստից հետո ասաց, որ դատարանի որոշումն անակնկալ չէր եւ նախորդ նիստին կանխատեսել էր, որ դատավորը կրկին մերժելու է:
«Մանվել Գրիգորյանի քրեական հետապնդումը սկսելուց առ այսօր, սա Մարինե Մելքոնյանի կամ Արսեն Նիկողոսյանի կողմից միակ պատճառաբանված, օրենքի հետ աղերս ունեցող դատական միջանկյալ ակտն է»:
Ըստ պաշտպանի, քանի որ գործն արդեն փոխանցված է այլ դատարան, եթե այս դատարանը բավարարեր այս միջնորդությունը դուրս կգար իր լիազորությունների շրջանակներից. «Մարինե Մելքոնյանը օրենքի հետ աղերս ունեցող որոշում կայացրեց եւ դա մերժումն էր: Այս դեպքում բավարարելը կլիներ օրենքի խախտում: Գոնե մի հաճելի զարմանք կա, որ գոնե հիմնավորում կա»:
Կարդացեք նաև
Արսեն Մկրտչյանն ասաց, որ արդեն չի էլ հիշում որերորդ անգամ է դատարանը մերժում իր նույն միջնորդությունը, սակայն, ըստ նրա, սա միակ ճիշտ հիմնավորումն էր:
Մանվել Գրիգորյանի գործը փոխանցվել է Կենտրոնի նստավայրի դատավոր Մնացական Մարտիրոսյանին: Հարցին, թե Մնացական Մարտիրոսյանի վերաբերյալ ի՞նչ կարծիք ունի, քանի որ պարբերաբար հայտարարել է, որ դատավոր Մարինե Մելքոնյանը Մանվել Գրիգորյանի նկատմամբ կանխակալ մոտեցում է ցուցաբերում, Արսեն Մկրտչյանն ասաց՝ լուրջ դատավոր է. «Համակարգում կան կայացած դատավորներ՝ անկախ նրանից թե նրանք ինչ որոշումներ են կայացնում, ազգանունները, անունները հայտնի են: Առաջին ատյանի դատարանի Կենտրոն նստավայրում, բացի դատավոր Գագիկ Պողոսյանից, մնացած բոլոր դատավորների մասին կարող եմ ասել, որ կայացած, փայլուն դատավորներ են, եւ ում վրա էլ մակագրվեր այս գործը մենք հույսը չէինք կորցնի վերջնական դատական ակտի համար: Թող ձեր մոտ տպավորություն չստեղծվի,որ ես բամբասչու պես դատավորների մասին բացասական կամ դրական կարծիքներ եմ անհիմն սփռում»:
Լուսինե ԲՈՒԴԱՂՅԱՆ
