Ապրիլի 10-12-ը Ռուսաստանի Կալինինգրադի մարզի Սվետլոգորսկ քաղաքում երկրորդ տարին անընդմեջ անցկացվում էր IPQuorum մտավոր սեփականության վերաբերյալ ռազմավարական ֆորումը: «Առավոտի» զրուցակիցն է IPChain ասոցիացիայի նախագահ, Իրավատերերի միության եվրասիական համադաշնության ղեկավար
Անդրեյ Կրիչեւսկին:
-Արդեն երկրորդ տարին է, ինչ անցկացվում է IPQuorum-ը: Անցած տարի ի՞նչ հաջողությունների եք հասել, ի՞նչ առաջընթաց եք գրանցել:
– Անցած տարվա գլխավոր արդյունքը այն է, որ նման ձեւաչափ է ստեղծվել, որ հնարավորություն եղավ այն իրագործել: Երկրորդը՝ ֆորումի արդյունքում ընդունված բանաձեւն է, որն այսօր իրականանում է մի շարք օրինագծերի միջոցով: Նրանք պատրաստվածության տարբեր մակարդակների վրա են, բայց, այնուամենայնիվ, շարժվում են, եւ այն գաղափարները, որոնք այստեղ՝ ֆորումի ընթացքում սկիզբ առան, նրանք աշխատում են: Այս տարվա ընթացքում, կարծում եմ, մեզ արդեն ավելին է հաջողվել: Մենք իսկապես կարողացել ենք տնտեսության տարբեր սեկտորների ավելի շատ ներկայացուցիչների ներգրավել, մենք նրանց հետ խոսում ենք ավելի հասարակ լեզվով: Մենք հասկացել ենք, որ մտավոր սեփականությունը միայն գործիք է, որ նրան պետք է ձեւափոխել ինչքան հնարավոր է ավելի խորը, հարմարեցնել տարբեր բիզնեսների կարիքներին, եւ բոլոր նրանց, ովքեր բովանդակություն են ստեղծում: Մենք այս տարվա ընթացքում շատ բաներ ենք գիտակցել, եւ հիմա մենք ցույց ենք տալիս այդ գիտակցության արդյունքները: Գիտե՞ք՝ ինձ՝ որպես ելույթ ունեցողի համար անցած տարի շատ ավելի բարդ էր: Ես խոսում էի մի լեզվով, որը կարծես թե ոչ ոք չի հասկանում: Դու նայում ես մարդկանց, եւ զգում ես, որ քեզ չեն հասկանում: Կարծես թե խելացի բաներ ես ասում, որոնց վրա վստահ ես: Իսկ այս տարի ես առաջին հերթին սկսեցի ավելի հեշտ արտահայտվել, ես հասկացա որոշ մտավոր սեփականության գործիքների էությունը: Մարդիկ սկսել են հասկանալ, այսինքն՝ մարդկանց աչքերն այժմ ուրիշ են: Դա անձնապես ինձ համար արդեն հաջողություն է: Իսկ ֆորումի համար՝ ուղղակի բազմազանություն, շփման այլ տեսակ: Գիտեք՝ այս տարի շատ-շատերն են հարցնում, թե ինչո՞ւ հենց Կալինինգրադը: Ես շատ ուրախ եմ, որ սկսել են այդ հարցը տալ, քանի որ անցած տարի չէին հարցնում: Այդ հարցը գիտեք ի՞նչ է նշանակում՝ ինչո՞ւ Մոսկվայում չէ: Այսինքն՝ պետք է, այսինքն՝ ցանկանում են, որ Մոսկվայում լինի……
-Իսկ կլինի՞:
Կարդացեք նաև
– Կարծում եմ՝ այո՛: Կարծում եմ, որ պետք է ընդառաջ գնալ: Բայց անկեղծ ասած, ես հույսեր եմ կապում Հայաստանի հետ: Քանի որ ձեր մոտ լավ փոփոխություններ կան: Դուք մեծ դժվարություններ ունեք, բայց միեւնույն ժամանակ՝ լավ փոփոխություններ: Հայաստանից եկել են երկու պատգամավորներ, ինձ շատ դուր եկավ Սուրեն Գրիգորյանը, որը նաեւ ելույթ ունեցավ: Նա բավականին գիտակից, պարզ եւ ճշգրիտ արտահայտվեց: Ես հասկացա, որ մարդը հասկանում է, թե ինչի մասին է խոսում: Եվ ես ակնկալում եմ, որ այն ամենը, ինչն ինքն այստեղ տեսավ եւ լսեց, տեղ կհասցնի, եւ Հայաստանում արդեն գործող մեր դուստր կառուցվածքի՝ IPChain ասոցիացիայի հիման վրա կկարողանանք նախաձեռնել ֆորում, մենք պատրաստ ենք ֆորումը ընդլայնել դեպի Հայաստան, մենք պատրաստ ենք Հայաստանի միջոցով ֆորումը ընդլայնել Հարավային Կովկասում: Դուք էլ տեսնում ենք, որ այստեղ հավաքվել են աշխարհի տարբեր երկրների ներկայացուցիչներ: Հայաստանի համար դա սովորական երեւույթ է, երբ նա դառնում է հավաքների կենտրոն, օրինակ՝ Ֆրանկոֆոնիայի գագաթաժողովը: Մի խոսքով՝ մտավոր սեփականության ոլորտի համար դա հնարավորություն է: Այսպիսով՝ սպասում ենք:
– Ի՞նչ ակնկալիքներ ունեք այս տարվա ֆորումից:
– Չգիտեմ: Ես ցանկանում եմ բոլոր սեսիաները, բոլոր ելույթները հավաքել, վերլուծել՝ ով ինչ է ասել, առանձնացնել ամենակարեւորը, եւ առանձնացնել ամեն մի սեսիայի թեզերը՝ ով ինչ է ասել: Նայել մտքերի տարբերությունը, որտե՞ղ այն չկա, որտե՞ղ են բոլորը մի կարծիքի, եւ դայջեստ անել դրանք: Եվ ցանկանում եմ ավարտել պետությունում անցանկալի շատ խոսակցություններ՝ արդյոք մեզ պե՞տք է մեկ միասնական կառույց՝ մտավոր սեփականության համար, արդյոք մեզ հարկավ՞ր է միասնական ռազմավարություն, ինչ անել օրենքի կիրառման հետ, արդյոք հարկավո՞ր է օրենք, օրինակ, որը կկարգավորի էլեկտրոնային հարթակների գործունեությունը:
– Ֆորումի ընթացքում Ձեր ելույթի ժամանակ Դուք խոսում էիք տիեզերքի մասին, IPChain-ը համեմատեցիք տիեզերանավի հետ, նշելով, որ երբեմն Դուք մի քանի քայլ առաջ եք: Որո՞նք են Ձեր հիմնական մարտահրավերները:
– Մեր հիմնական մարտահրավերը տիեզերքից վախը հաղթահարելն է: Հասկանալի է՝ ինչպես հաղթահարել այն, պետք է ստեղծել կիրառելի ծառայություններ, որոնք թույլ կտան այստեղ եւ հիմա լուծել խնդիրներ: Բայց հենց այդ տիեզերանավի օգնությամբ, որը մենք կկառուցենք:
– Իսկ ֆորումը կարո՞ղ է լինել բանալի:
– Գիտեք, յուրաքանչյուր սեսիային, որին մասնակցել եմ, շատերին ես չեմ ճանաչում, շատերին, ում ճանաչում եմ, իրենք նախկինում ինձ հետ չէին խոսում IPChain-ի մասին, սկսում են IPChain-ի մասին խոսել: Ես ապշում եմ՝ թե ինչպես: Իհարկե՛, ֆորումը մեկ քայլ առաջ է, խթանում է հասկացությունն ավելի լայն զանգվածների մոտ:
– Դուք նաեւ ասացիք, որ կազմակերպությունները շատ ավելի հազվադեպ են հետաքրքրվում IPChain-ով: Ո՞րն է պատճառը, միգուցե ֆինանսական միջոցները:
– Ո՛չ, Դուք երբ նայում եք երկնքին, Դուք մտածո՞ւմ եք աստղերի մասին, թե՞ տիեզերքի: Ես ընդհանրապես կարծում եմ, որ Դուք մտածում եք՝ հիմա արեւ կա՞, ամպերը նրան փակե՞լ են: Դա է պատճառը: Ամեն ինչ շատ պարզ է: Նորմալ է մտածել, թե ինչու արեւը չի շողում, դու չես մտածում աստերոիդի մասին, բայց այն գալիս է, հարցը դրանում է:
– Իսկ տեխնիկական առումո՞վ:
– Այստեղ ամեն ինչ նորմալ է, մենք ժամանակակից ենք: Եվ դա մենք տեսնում ենք կենդանի օրինակների վրա: Այնպես որ, այստեղ տեխնիկական խնդիրներ չկան, այստեղ հոգեբանական խնդիրներ են, մոդելային:
– Իսկ դա կապ ունի՞ տարածաշրջանի հետ:
– Ե՛վ կապ ունի, եւ՛ չունի: Ես ասացի, որ հանդիպել ենք Microsoft-ի, Google-ի հետ, նույն պատմությունն է: Իհարկե՛, եթե հանդիպես սեփականատիրոջ հետ, այստեղ միանգամից պատկերը կփոխվի, այստեղ մարդիկ հետաքրքրվում են, ցանկանում են փորձել, իսկ եթե հանդիպում ես IP բաժնի ղեկավարի հետ, նրանք «արեւին են նայում»:
– Իսկ այստեղ լուծում կա՞:
– Պետք է տալ կիրառական լուծումներ, կիրառական ծառայություններ կատարել: Մենք արդեն դա անում ենք, եւ մոտ ապագայում նաեւ այս արտադրանքով հանդես կգանք: Պարզապես պետք է ձեռք մեկնել:
– Դուք արդեն անդրադարձաք Հայաստանին: Բայց կցանկանայի ավելի մանրամասն խոսել: Երկրորդ տարին է, որ Հայաստանից պատվիրակություն է մասնակցում ֆորումին, բայց այս անգամ մասնակցում են նաեւ պատգամավորներ: Արդյոք Հայաստանի հետ կապված նախագծեր ունե՞ք: Եվ ինչպե՞ս եք գնահատում Հայաստանում գործող համակարգերը:
– Հայաստանում մտավոր սեփականության ոլորտը խիստ բացասական եմ գնահատում, այսինքն՝ զրոյից ցածր: Մտավոր սեփականության գործակալության աշխատանքը չի համապատասխանում ոչ մի չափորոշիչի: Հեղինակային իրավունքի առումով իրավիճակը մի փոքր ավելի լավ է, կան աշխատող կազմակերպություններ: Ես շատ բաներ չեմ հասկանում, չեմ հասկանում՝ նոր տեխնոլոգիաներ չներդնելու ցանկությունը, ես չեմ հասկանում այդ կազմակերպությունների օպորտունիզմը, ես չեմ հասկանում IPChain-ի ներդրման նկատմամբ հակազդեցությունը: Բայց այստեղ գոնե ինչ-որ մի բան աշխատում է, հեղինակների հետ աշխատում են, ինչ-որ կերպ օգնում են: Եվ այստեղ հենց այնպես չեն եկել պատգամավորները: Իրականում, ոլորտի համար դա լուրջ ազդանշան է: Եթե իմ փոխարեն կամ ինձ հետ միասին ինչ-որ մի կոնֆերանսի գնային Պետդումայի պատգամավորներ, ես իսկապես կմտածեի:
Իսկ ինչ վերաբերում է ծրագրերին, մենք այնտեղ ստեղծել ենք դուստր կառույց, այն արդեն աշխատում է: Այժմ պատրաստվում է գրասենյակ, սերվերներ են տեղադրվում: Նորմալ աշխատանքային ընթացք է:
ԱՄԻ ՉԻՉԱԿՅԱՆ
«Առավոտ» օրաթերթ,
20.04.2019
