«Ազգային օրակարգ» կուսակցության հիմնադիր հանձնախմբի անդամ Արա Գասպարյանը «Պոստ սկրիպտում» ակումբում խոսեց մեր երկրի առաջ ծառացած մարտահրավերներից:
«Մենք գտնվում ենք հիբրիդային պատերազմի մեջ՝ հակառակորդ երկրի հետ: Հիբրիդային պատերազմը հակառակորդի կողմից կիրառվող տնտեսական, քաղաքական, ռազմական, տեղեկատվական միջոցների ամբողջություն է: Սրանք բոլորը կիրառվում են որոշակի ռազմավարության շրջանակներում եւ այն ուղղված է առաջին հերթին մեր հասարակությանը եւ մեր պետականությանը: Սրա նպատակն է մեր պաշտպանունակության թուլացումը»,-պարոն ասաց Գասպարյանը:
Նրա ձեւակերպմամբ, այդ ամենի եւ առաջնագծում ռազմական տարբեր գործողությունների, դիվերսիաների նպատակը բանակի նկատմամբ վստահության անկումն է հասարակության ներսում, սպայի մասնագիտության նկատմամբ հետաքրքրության նվազումը, բանակի ներսում միջանձնային կոնֆլիկտների սրումը:
«Այդ ամենը հինգերորդ շարասյան ներկայացուցիչների կողմից հաճախ օգտագործվում է բանակի եւ բանակի ղեկավարությանը վարկաբեկելու նպատակով: Երբ մենք մեր անվտանգային մարտահրավերների մասին ենք խոսում, առաջին հերթին պետք է հաշվի առնենք այս համատեքստը»,- կարծում է նա:
Կարդացեք նաև
«Ազգային օրակարգ» կուսակցության հիմնադիր հանձնախմբի անդամը համոզված է՝ պետք է տարատեսակ հակազդեցության քայլեր մշակել՝ տեղեկատվական, ռազմական, քաղաքական եւ տնտեսական բնույթի: Նրա խոսքերով, իշխանությունը ցանկացած որոշում կայացնելիս պետք է հաշվի առնի ռիսկայնության գործոնը:
«Օրինակ պայմանավորվածություններ են ձեռք բերվում կրակի դադարեցման վերաբերյալ, բայց այդ կրակի դադարեցման արդյունքում ադրբեջանցիները Նախիջեւանի եւ այլ ուղղություններով ամրացնում են իրենց դիրքերը: Այսինքն, ստացվում է, որ մեկը մյուսի վրա չկրակելու պայմանավորվածությունները այնքան էլ չեն համապատասխանում մեր անվտանգության խնդիրներին…Նախիջեւանի ուղղությամբ դիրքերը առաջ են բերվել, իսկ հայ-ադրբեջանական սահման, որպես այդպիսին գոյություն չունի միջազգայնորեն»,- փաստում է բանախոսը:
«Վտանգավոր է երկրում տարածված պացիֆիզմի քարոզը: Երբ հարեւանդ պատրաստվում է պատերազմի, մեր հասարակությանը պատրաստում են խաղաղության: Վտանգավոր է, երբ խոսում են երկրում առկա գործակալական ցանցերի մասին, ընդ որում, վարչապետն է այդ մասին խոսում, բայց դրանից հետո գործողություններ չեն հետեւում: Եվ պարզ չէ, թե այդ գործակալական ցանցը կամ գործակալներն ովքեր են»,-ասում է Արա Գասպարյանը:
Գոհար ՀԱԿՈԲՅԱՆ
