«Ամերիկայի ձայն». Ֆրանսիայի իշխանությունները հայտնում են, որ 14-րդ դարի բոլոր նկարները, որոնք գտնվում էին Փարիզի Սուրբ Աստվածամոր տաճարում, փրկվել են և չեն վնասվել: Դրանք կարիք ունեն ընդամենը մի փոքր խնամքի և վերականգման:
Դրա մասին տեղեկացրել է Ֆրանսիայի մշակույթի նախարար Ֆրանկ Ռիեսթերը, ով ընդգծել է, որ նկարների վերականգման և չորացման աշխատանքներն արդեն ընթացքի մեջ են:
Դա վերաբերում է նաև մեծ նկարներին: Նախարարը նշել է, որ մոտ օրերի ընթացքում աշխատանքներ կտարվեն նաև մեծ նկարներն արհեստանոցներ տեղափոխելու ուղղությամբ՝ դրանց վերականգնելու և չորացնելու համար:
«Նկարները սկսել են չորացվել նորմալ պայմաններում, որն իհարկե շատ լավ լուր է: Բոլոր նկարները, ներառյալ մեծերը, որոնց դեռևս չենք անդրադարձել, կիջեցվեն և կվերականգնվեն մոտ օրերի ընթացքում»,- հայտնել է նախարարը:
Կարդացեք նաև
Արվեստի և մշակույթի կոթողների շուրջ 90 տոկոսը, որոնք պահվում էին Փարիզի Սուրբ Աստվածամոր տաճարում , հնարավոր է եղել փրկել հրդեհից, շնորհիվ փրկարարական ծրագրի, որը գործի է դրվել հրդեհի ժամանակ: Դրա մասին օրերս տեղեկացրել է ապահովագրության մասնագետ Մայքլ Հոնորը:
Ինչպես նշում է Ֆրանսիայի մշակույթի նախարարը, հրշեջ ծառայության աշխատակիցները դեռևս շարունակում են աշխատանքներ տանել տաճարի ներսում՝ կամարներն ամրացնելու ուղղությամբ: Մինչ այդ տաճարում պահվող մշակութային բոլոր գանձերը դուրս կբերվեն և կվերականգնվեն:
