Այսօր Հայաստանի Հանրապետությունում Արաբական Միացյալ Էմիրությունների նորանշանակ դեսպան Ն․Գ․ Մուհամմադ Իսա Ալ Զաաբին և դեսպանության հյուպատոս Ահլամ Ալ Սալամին Գյումրիում հայտնեցին, որ իրենց երկրում ապրում են երկու հարյուր ազգությունների ներկայացուցիչներ, կա նաև հայկական համայնք, որը բաղկացած է վեց հազար հայերից։
Aravot.am-ը դիվանագետներից հետաքրքրվեց, թե ի՞նչ դիրք են զբաղեցնում հայերը Էմիրություններում․ նրանք հիմնականում բիզնես ոլորտում են ընդգրկվա՞ծ, թե՞ կան ազդեցիկ դեմքեր նաև կառավարման ոլորտում։
«Արաբական Միացյալ Էմիրություններում հայկական համայնքը հնագույնն է համարվում․ դեռևս Հայոց Ցեղասպանությունից հետո այստեղ հանգրվանել են բազմաթիվ հայ ընտանիքներ, որոնք օգնել են նաև Էմիրությունները կառուցելուն և բիզնես ոլորտով զբաղվելու հարցում։ Մի այսպիսի դեպք եղավ․ վերջերս Երևանում հանդիպել ենք մի հայ մարդու, որը մեզ պատմեց, որ ապրել ու աշխատել է Էմիրություններում 50-ական թվականներից։ Նա Շարժայում շինարարական կազմակերպություն ուներ և մեծ ներդրող էր համարվում։Հայերի մեջ կան շատ բիզնեսմեններ»,- ասաց հյուպատոս Ահլամ Ալ Սալամին։
Կարդացեք նաև
Արաբական Միացյալ Էմիրությունների նորանշանակ դեսպան Ն․Գ․ Մուհամմադ Իսա Ալ Զաաբին էլ, խոսելով Հայաստանի Հանրապետության և Արաբական Միացյալ Էմիրությունների միջև առկա ապրանքաշրջանառության մասին, ասաց․«2017 թվականին 250 միլիոն դոլարի է հասել, 2018 թվականին՝ 180 միլիոն դոլարի։ 2018 թվականին 111 հազար 500 էմիրատցի է այցելել Հայաստան, մենք անմիջական ավիաընկերություններ ունենք և շաբաթական 16 չվերթ է կատարվում, և սա մեծ դեր է կատարում երկու երկրների միջև ապրանքաշրջանառության բարձրացմանը»։
Որ ոլորտներում ներդրումներ կանեն, դիվանագետներն ասացին, որ հիմնականում հետաքրքրված են գյուղատնտեսության ոլորտով, պատճառը օդային կարճ ճանապարհն է, երեք ժամ է Երևան հասնելը։
Ի դեպ, այսօր Գյումրու քաղաքապետ Սամվել Բալասանյանը խնայողական էներգիայի, տարբեր տեսակի ապրանքների արտահանման ու իրացման ոլորտը կարևորելով՝ խոսել է նաև «Շիրակ» օդանավակայանից դեպի Էմիրություններ չվերթ մտցնելու մասին, որը կնպաստի տուրիզմի զարգացմանը։
Նունե ԱՐԵՎՇԱՏՅԱՆ
