Այսօր Մամուլի ազգային ակումբում տեղի ունեցավ Քաղաքական Լիգայի ներկայացուցիչների և Բեռլինի Հումբոլտի համալսարանի դոկտոր, Սահմանադրական դատարանի դատավորի նախկին թեկնածու Գոռ Հովհաննիսյանի հետ հանդիպումը:
Հանդիպման սկզբում Գոռ Հովհաննիսյանը խոսեց Սահմանադրության փոփոխության մասին՝ նշելով, որ մենք երեք անգամ Սահմանադրություն են փոխել, բայց մեր կյանքը չի փոխվել. խնդիրը մեր իրավագիտակցության մեջ է:
Քաղաքական լիգայի նախագահ Նարինե Մկրտչյանի այն հարցին, թե իր թեկնածության մերժման հարցում քաղաքականությունը նրան խանգարե՞ց, թե՞ ոչ, պարոն Հովհաննիսյանը պատասխանեց. «Ես կարծում եմ, որ, այո, քաղաքականությունը խանգարեց, ես խնդիր չունեմ իմ թեկնածության մերժման մեջ, խնդիրը ձևն ու մակարդակն էր, թե ինչպես այն ընդունվեց: Շատ ավելի քաղաքակիրթ կլիներ, եթե խորհրդարանը նախօրոք հայտարարեր, որ նրանք քաղաքական նկատառումներով մերժելու են իմ թեկնածությունը»:
Կարդացեք նաև
Հանդիպման ընթացքում նա նշեց, որ, եթե խորհրդարանը ձգտի, որ իրենց թեկնածուն կատարի իրենց կամքը, ապա Հայաստանը այդպես էլ չի ունենա օբյեկտիվ և արդար դատարաններ:
Նա նաև անդրադարձավ նրան, թե ինչու խորհրդարանի՝ իր ելույթում այդպես էլ չխոսեց ընտրական կեղծիքների վերաբերյալ, որ նա չի կարող որպես ՍԴ դատավորի թեկնածու քաղաքական հայտարարություններ անել:
Քաղաքական Լիգայի ներկայացուցիչներից մեկի այն հարցին, թե կա՞ արդյոք լուծում ՍԴ-ի դերի բարձրացման համար, Գոռ Հովհաննիսյանն այսպես արձագանքեց. «Բոլոր դատարանների դատավորները հրաշքով պետք է դառնան չեզոք»:
Գոռ Հովհաննիսյանն հավելեց նաև, որ միշտ այն տպավորությունն է ունեցել, որ արտասահմանից եկած մասնագետները այստեղ անցանկալի են այն իմաստով, որ նրանք գալիս ու ասում են բաներ, որ Հայաստանի քաղաքական ուժերը չգիտեն:
Վերջում ՍԴ նախկին թեկնածուն շեշտեց նաև, որ Հայաստանը չունի իրավաբանական լավ կրթություն: Որքան էլ օրենքները լավը լինեն, իրավաբանների ոչ ժամանակակից մոտեցումն իր դերը խաղում է:
Անի ՍՈՒՔԻԱՍՅԱՆ
