ԱԺ այսօրվա նիստում քննարկվում է ՀՀ Տնտեսական մրցակցության պաշտպանության պետական հանձնաժողովի նախագահի ընտրության հարցը: Այս պաշտոնում ՀՀ վարչապետ Նիկոլ Փաշինյանն առաջադրել է Գեղամ Գեւորգյանի թեկնածությունը:
«Իմ քայլը» խմբակցության պատգամավոր Թագուհի Թովմասյանը Գեղամ Գեւորգյանի ուշադրությունը հրավիրեց այն փաստի վրա, որ շուկայում մենաշնորհային դիրքորոշում ունեցող որոշ խաղացողներ սնանկ են հայտարարվում, սակայն հետագայում այլ ընկերություններ են բացում եւ շարունակում աշխատել: «Օրինակ, հետախուզման մեջ գտնվող Միհրան Պողոսյանին (ԴԱՀԿ ծառայության նախկին պետ) պատկանող «Քեթրին» ընկերությունը սնանկացավ, սակայն նոր բացված ընկերությունը նույնպես բանանի ներկրմամբ է զբաղվում»,-մատնանշեց Թագուհի Թովմասյանը:
Գեղամ Գեւորգյանը պատասխանեց, որ պետք է ուսումնասիրել եւ հասկանալ՝ հակամրցակցային բան կա՞ այստեղ, թե ոչ. «Գուցե անձն ինքնակամ գնացել է հարկադիր սնանկության՝ պարտքերից ազատվելու համար, հետո նոր ընկերություն բացել՝ նոր էջից սկսելու համար: Կդժվարանամ ասեմ, բայց այս դեպքում կարծես թե չկա հակամրցակցային գործոն, բայց եթե հետագայում նկատենք, այդ ընկերության գործողությունները ներկրման կամ արտահանման առումով ոչ մրցակցային պայմաններ կամ առավելություններ են ստեղծում, կանդրադառնանք»:
Թագուհի Թովմասյանն այսպես եզրափակեց. «Ես մեկ օրինակ բերեցի, բայց դրանք շատ են: Եթե ընտրվեք, հատուկ ուշադրություն դարձրեք ընկերությունների սեփականատերերին»:
Կարդացեք նաև
Լուիզա ՍՈՒՔԻԱՍՅԱՆ
