Սուսաննա Պատվականյանն ու նրա ներկայացուցիչ, ՀՀ փաստաբանների պալատի անդամ Մարատ Կոստանյանը պաշտոնատար անձանց գործողությունների դեմ բողոքով դիմել էին դատարան, որն այս տարվա մարտի 15-ին որոշում է կայացրել, արձանագրելով, թե կողմի բողոքը բերվել է ժամկետների կետանցմամբ:
Վերաքննիչ քրեական դատարան էր այսօր ներկայացել դատախազը՝ պարոն Սարգսյանը, իսկ նախագահողն էր Լուսինե Աբգարյանը:
Դատավորն ասաց, թե բողոքը լսվելու է միայն ժամկետների հետ կապված, մինչդեռ, այս բողոքն առնչվում է անձնական տվյալների, անձնական կյանքի որոշ դրվագների հետ:
Ի դեպ, Սուսաննա Պատվականյանի խնդրին տասնյակ անգամ անդրադարձել է «Առավոտը», այն կապված էր նրա ծննդաբերելու, ապա իր երեխային «մահացած» համարելու, ապա վաճառքի հետ: Նշվում էր ճանաչված մանկաբույժ Ռազմիկ Աբրահամյանի անունը:
Կարդացեք նաև
Անցյալ տարվա օգոստոսին Ս. Պատվականյանը նամակով դիմել էր վարչապետին, ՀՀ գլխավոր դատախազին հանցագործության մասին հաղորդմամբ: Ըստ բողոքաբեր կողմի, «հաղորդումն ուղարկվել էր գլխավոր դատախազության մինդատական վարույթի օրինականության նկատմամբ վերահսկողություն իրականացնող դատախազին, որում որոշ փաստեր վերաշարադրվել են բացարձակապես սուտ հռչակումներով, մերժվել է հաղորդմանն ընթացք տալ»:
Aravot.am-ի հետ զրույցի ժամանակ փաստաբանն ասաց, որ անհերքելի փաստերի խեղաթյուրումը կատարվում է հանցագործությունը պարտակելու եւ մեղավորներին քրեական պատասխանատվությունից ազատելու կոնկրետ դիտավորությամբ:
Վերաքննիչ քրեական դատարանը բողոքի ժամկետների հետ կապված ժամանակ տվեց կողմերին, որպեսզի նրանք դատարան ներկայացնեն ծանուցագրերն ու տեղեկություններ:
Ռուզան ՄԻՆԱՍՅԱՆ
