Այսօր կառավարության նիստից հետո լրագրողների հետ ճեպազրույցում պետական վերահսկողական ծառայության պետ Դավիթ Սանասարյանն ասաց՝ Արմավիր եւ Էջմիածին ջրօգտագործողների միություներում 2 միլիարդ դրամի չափով չարաշահումներ է հայտնաբերել: Գումարը ենթակա է վերադարձման:
Սանասարյանի փոխանցմամբ՝ ՊՎԾ-ն տարբեր գյուղերում մեծ չափերի թաքնված հողեր է հայտնաբերել, եւ ջրի կորուստները նորմայից ավելի են եղել. «Չհիմնավորված դեբիտորական պարտքեր են եղել: Այսինքն՝ չեն մատակարարել, բայց պարտքեր են կուտակել՝ եկել են ընտրությունների ժամանակ պարտքերը փչվել են: Մեծ հզորության շարժիչների փոխարեն՝ մուտքագրվել է փոքր հզորությանը, այսինքն՝ ցույց են տվել քիչ ջուր են հանել, բայց իրականում, մենք դեպքեր ունենք, թե այդ հզորության շարժիչներն ինչ քանակի ջուր են մղել»:
ՊՎԾ-ի ուսումնասիրությունը վերաբերում է 2014-2018 թվականներին:
Կարդացեք նաև
Սանասարյանն ասաց, որ ոստիկանությունում այս մասին գործ է հարուցված եւ հույս հայտնեց ոստիկանության գործին կպնի իրենց գործը: Այս երեւույթն, ըստ Սանասարյանի համատարած է:
Սանասարյանի խոսքով՝ «Հայաստանում կարեւոր ռեսուրսների ոլորտում երկար տարիներ գործել է ջրային մաֆիա»:
Արդյոք նախկին վարչապետ Հովիկ Աբրահամյանը կապ ունի այս երեւույթի հետ, քանի որ նրա ընտանիքը գյուղատնտեսական հողեր ունի, Սանասարյանն անուններ չտվեց:
Նելլի ԲԱԲԱՅԱՆ
