Ապրիլի 15-ին հրապարակվեց Բարձրագույն դատական խորհրդի գործունեության վերաբերյալ տարեկան հաղորդումը, որի համաձայն դատարանները՝ միայն փոստային առաքումների վրա ծախսում են տարեկան մոտ 500 միլիոն դրամ: Կարելի է ենթադրել, թե ամբողջ պետական համակարգի համար այս թիվը տարեկան որքան կարող է կազմել:
Սա մեծ շռայլություն է համեստ ֆինանսական հնարավորություններ ունեցող ցանկացած պետության համար:
Կարծում եմ՝ արդեն ժամանակն է, որ հասարակություն-պետական մարմիններ պաշտոնական փաստաթղթաշրջանառությունը հնարավոր լինի իրականացնել մեկ միասնական էլեկտրոնային հարթակի միջոցով։
Քաղաքացին՝ համակարգչի առաջ նստած, պետք է հնարավորություն ունենա պաշտոնապես դիմել պետական որևէ մարմնի և ստանալ պաշտոնական պատասխան, և նույն կերպ, պետական մարմինը պետք է կարողանա քաղաքացուն ծանուցումներ կամ այլ տիպի պաշտոնական փաստաթղթեր ուղարկել էլեկտրոնային եղանակով:
Կարդացեք նաև
Դրա համար անհրաժեշտ է ստեղծել համապատասխան ինտերնետային հարթակ՝ բոլոր Սահմանադրական , պետական և տեղական ինքնակառավարման մարմինների ներգրավմամբ, պետական լիազոր մարմնի կողմից իրականացնել համացանցային տիրույթում ֆիզիկական և իրավաբանական անձանց նույնականացում(վերջիններիս ցանկությամբ), որից հետո հնարավորություն կստեղծվի պետական մարմիններին ուղարկել և նրանցից ստանալ իրավական ուժ ունեցող տարբեր դիմումներ, ծանուցումներ, հաշվետվություններ, տարբեր բնույթի պաշտոնական գրություններ։
Սա և հարմարավետ է, և արագ ։
Ասվածը, իհարկե, չի նշանակում, որ հասարակություն-պետական մարմին շփումներում հնարավոր է միանգամից անցում կատարել էլեկտրոնային փաստաթղթաշրջանառության, քանի որ ամբողջական անցման համար ժամանակ է անհրաժեշտ։
Առաջին փուլում կարելի է համացանցային հարթակը գործարկել գործող տարբերակին զուգահեռ, հընթացս իրականացնել ուսումնասիրություն՝ պարզելու համար այս գործիքի արդյունավետությունը, առաջացող խնդիրները, այս հարթակին հասարակության ներգրավվածության աստիճանը և այլն։
Կարևոր է ընդգծել, որ խոսքը վերաբերվում է հասարակություն-պետություն օղակին, այլ ոչ թե պետական մարմինների ներքին փաստաթղթաշրջանառությանը։
Համոզված եմ, որ տեղեկատվական տեխնոլոգիաների բնագավառում մեր գիտական միտքը ի զորու է ամբողջ ծավալով իրականացնել այս նախագծի ստեղծման և ծրագրային ապահովման աշխատանքները:
Սա հնարավորություն կտա տեսանելի ապագայում խնայել հսկայական պետական միջոցներ, և ևս մեկ քայլ կլինի քաղաքացու հարմարավետության և բյուրոկրատական քաշքշուկները նվազագույնի հասցնելու ուղղությամբ:
Հայկ Արամյան
քաղաքագետ, իրավագետ
