Ղազախստանի նախկին նախագահ Նուրսուլթան Նազարբաևը, որը մարտին հայտարարել էր իր հրաժարականի մասին, հնարավոր է՝ նոր պաշտոն ստանա: «Կոմերսանտի» աղբյուրները պնդում են, որ Ղազախստանի մայրաքաղաքում սպասվող ԵԱՏՄ գագաթնաժողովում նա կնշանակվի միության պատվավոր նախագահ:
Նախատեսվում է, որ նշանակումը տեղի կունենա մայիսի 29-ին՝ Նուրսուլթանում (նախկին Աստանա) Եվրասիական տնտեսական բարձրագույն խորհրդի նիստին, որին մասնակցելու են ԵԱՏՄ բոլոր երկրների (Հայաստան, Բելառուս, Ղազախստան, Ղըրղզստան, Ռուսաստան) առաջնորդները: Միջոցառումը նվիրված է լինելու ԵԱՏՄ 5-ամյակին. հենց 2014թ. մայիսի 29-ին Աստանայում ստորագրվել է այդ ինտեգրացիոն միավորման ստեղծման մասին պայմանագիրը:
Նազարբաևին ԵԱՏՄ պատվավոր նախագահ նշանակելու որոշումը, ըստ թերթի զրուցակիցների, արդյունք է միության ստեղծման գործում նրա ներդրած ջանքերի: Ղազախստանի նախկին նախագահը եղել է եվրասիական ինտեգրման գաղափարախոսներից մեկը: Հենց նա է 1994թ. Մոսկվայի պետական համալսարանում իր ելույթում առաջ քաշել ԽՍՀՄ նախկին հանրապետությունները ինտեգրացիոն նոր կառույցում միավորելու գաղափարը:
Նազարբաևի դերը՝ որպես եվրասիական ինտեգրման հիմնադիր, հաստատում է և Ղազախստանի գործող նախագահ Քասիմ-Ժոմարտ Տոկաևը: Ապրիլի 3-ին «Կոմերսանտի» հետ զրույցում նա ընդգծել էր եվրասիականության գաղափարախոսության արդիականությունը՝ մատնանշելով Նազարբաևի առանձնահատուկ ներդրումն այդ գործում:
Կարդացեք նաև
Ի դեպ, Ղազախստանի մայրաքաղաքում հոբելյանական գագաթնաժողովի գաղափարը պատկանում է հենց Նազարբաևին. 2018թ. դեկտեմբերին նա հանդես էր եկել նման առաջարկով:
«Կոմերսանտի» մեկ այլ զրուցակից որպես Նազարբաևին պատվավոր նախագահ նշանակելու պատճառ նշում է նրա հեղինակությունը: «Նազարբաևի փորձը և հեղինակությունը պետք կգա միջազգային թատերաբեմում ԵԱՏՄ-ի դիրքավորման համար»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
