«Ռուսաստանի հետ ձեռք է բերվել պայմանավորվածություն, որ մինչեւ հուլիսի մեկը կներկայացվի սահմանին բնական գազի գնի ձեւավորման մասին համաձայնագիրր»,-ԱԺ այսօրվա նիստում հայտարարեց հանրային ծառայությունները կարգավորող հանձնաժողովի նախագահի պաշտոնում վարչապետ Նիկոլ Փաշինյանի առաջադրած թեկնածու Գարեգին Բաղրամյանը՝ անդրադառնալով հարցին, թե ռուսական գազի մատակարարման շուրջ բանակցություններն ինչ փուլում են:
Հիշեցնենք, որ ըստ պայմանավորվածության՝ սահմանին թանկացած գազն այս տարում սպառողների համար չի թանկանա:
«Համաձայնագրում կամրագրվեն գնագոյացման մոտեցումները՝ հնգամյա ժամանակահատվածի համար: Որոշակի կանխատեսելիություն կունենանք այն մասին, թե սահմանին ռուսական գազի գինն ինչպես է փոխվելու առաջիկա հինգ տարում»,-տեղեկացրեց Գարեգին Բաղրամյանը: Նաեւ նշեց, որ «Գազպրոմ Արմենիա»-ին ՀՀ կառավարությունը որոշակի առաջարկներ է ներկայացրել՝ հնգամյա ժամկետով:
Գարեգին Բաղրամյանը նաեւ հայտնեց, որ ԵՏՄ-ի շրջանակում նախատեսվում է 2020թ.-ին հինգ անդամ-երկրների էներգահամակարգերը միավորել եւ էլեկտրաէներգիայի առեւտրի մեկ էլեկտրոնային հարթակ ստեղծել. «Դա հնարավորություն կտա ավելի էժան էլեկտրաէներգիա ներկրել, ՀՀ-ն էլ հնարավորություն կունենա ավելի մեծ ծավալով էլեկտրաէներգիա արտահանել»: Ըստ Գարեգին Բաղրամյանի՝ 2025թ.-ին կձեւավորվի նաեւ ԵՏՄ գազի ընդհանուր շուկան. «Գազի փոխադրման սակագների առնչությամբ դեռեւս կան վեճեր՝ անդամ երկրների միջեւ»:
Կարդացեք նաև
Լուիզա ՍՈՒՔԻԱՍՅԱՆ
