ՀՀ Ազգային ժողովն այսօր առաջին ընթերցմամբ ընդունեց «ՀՀ կառավարության կառուցվածքի եւ գործունեության մասին օրենքում փոփոխություններ եւ լրացումներ կատարելու մասին» օրենքի նախագիծը: «Կողմ» էր քվեարկել 71, իսկ «դեմ»՝ 40 պատգամավոր: Հիշեցնենք, որ կառավարության նոր կառուցվածքը ենթադրում է 12 նախարարություն՝ 17-ի փոխարեն:
«Լուսավոր Հայաստան» խմբակցության պատգամավոր Էդմոն Մարուքյանը հայտարարեց, որ իրենց բոլոր առաջարկները մերժվել են. «Այս կառուցվածքը երկար չի գործելու, քանի որ այն ի սկզբանե արդյունավետ չէ, այն պահպանում է սուպերվարչապետական համակարգը, որի դեմ երկար տարիներ պայքար է եղել»:
Նախագծի զեկուցող, ՀՀ արդարադատության նախարար Արտակ Զեյնալյանն իր հերթին նշեց, որ ԼՀԿ-ի առաջարկած կառուցվածքը հիմնված չէ կարիքների գնահատման վրա, մինչդեռ խմբակցությունն իրենց է մեղադրում ուռճացված կառուցվածք ներկայացնելու համար. «Մեզ մեղադրում եք Սերժ Սարգսյանի կոստյումը վերցնելու եւ կոճակներ կտրելու համար: Ձեր կառուցվածքի հիմքում իրականում մեր նախագիծն է, դու մեր նախագծի վրա եք փոփոխություններ արել: Ասում եք, թե մենք երկու կոճակ ենք հանել՝ Սփյուռքի եւ Մշակույթի նախարարությունները: Փաստորեն, իրականում հոգու խորքում այդ նախարարություններին դուք վերաբերվում եք որպես կոստյումի երկու կոճակի»:
Ինչ վերաբերում է Մարուքյանի պնդմանը, որ ԱԱԾ-ն եւ Ոստիկանությունը պետք է նախարարություններ դառնան, որպեսզի լինեն խորհրդարանի վերահսկողության ներքո, Արտակ Զեյնալյանը չհամաձայնեց. «Արդյոք միակ վերահսկողական գործիքը հարցուպատասխա՞նն է: Իհարկե, ոչ, ԱԺ պատգամավորը կարող է գրավոր հարցումներ հղել, նախաձեռնել լսումներ, ԱԱԾ-ի եւ Ոստիկանության պետին հրավիրել խմբակցություն, օգտագործել ԶԼՄ-ների ներուժը, գանգատ ներկայացնել ՍԴ, դիմում հղել վարչական դատարանին: Այս ամենը գործիքներ են»:
Կարդացեք նաև
Հիշեցնենք, որ կառավարության կառուցվածքի մասին նախագիծը դեռ պետք է անցնի երկրորդ ընթերցում:
Լուիզա ՍՈՒՔԻԱՍՅԱՆ
