Նմանատիպ դեպքերը պետք է բացառվեն: Կառավարման անվտանգ ու արդյունավետ համակարգի համար նոր մեխանիզմներ են անհրաժեշտ. Հայկ Չոբանյան, Տավուշի մարզպետ
Ապրիլի 15-ին մի խումբ անձինք իր ծառայական պարտականությունները կատարելու ժամանակ բռնություն են գործադրել Հայանտառի Արծվաբերդի մասնաճյուղի պահպանության գծով տնօրենի տեղակալ Նորայր Պապյանի նկատմամբ: Իրավապահ մարմիններն անմիջապես արձագանքել են, քրեական գործ է հարուցվել, և արդեն կան բերման ենթարկվածներ:
Տավուշի մարզպետ Հայկ Չոբանյանը հեռախոսով կապվել է տուժած պաշտոնյայի հետ, ճշտել որպիսությունը, հայտնել իր զորակցությունն ու երախտագիտությունը՝ պաշտոնեական խիզախումի համար և վստահեցրել, որ մեղավորներն անպայմանորեն կստանան իրենց արժանի պատիժը:
Տավուշի մարզպետն այսօր խորհրդակցության է հրավիրել մարզի իրավապահ մարմինների ղեկավարներին: Քննարկվել են իրենց պաշտոնեական պարտականություններն իրականացնող իշխանության ներկայացուցիչների անվտանգության, պաշտպանվածության, կատարվող հանցագործությունների համար պատժի անխուսափելիության, ծագող խոչընդոտների, դրանց հաղթահարման ուղիների, համագործակցության նոր ձևաչափերի և, մասնավորապես, ապօրինի անտառհատման կանխարգելման հարցեր: Հայկ Չոբանյանը շեշտել է, որ իր պարտականությունները բարեխղճորեն իրականացնող պաշտոնյան իրեն պիտի ապահով, անվտանգ ու պաշտպանված զգա, և մեր պարտքն է ապահովել այդ միջավայրը, առավել արդյունավետ դարձնել կառավարման համակարգը: Հին սխեմաներն այլևս չեն գործելու:
Կարդացեք նաև
Տավուշի մարզպետարան
