Կառավարություն-ԱԺ հարցուպատասխանի ժամանակ այսօր «Իմ քայլը» խմբակցության պատգամավոր Թագուհի Թովմասյանը վարչապետ Նիկոլ Փաշինյանի ուշադրությունը հրավիրեց այն փաստի վրա, որ Գեղարքունիքի մարզի Վանեվան գյուղում մեկ շաբաթ է՝ իրավիճակը չի հանդարտվում. «Գյուղացիները պահանջում են գյուղապետի հրաժարականը, գյուղի հովիվն արդեն մեկ շաբաթ՝ հացադուլ է անում գյուղապետարանի դիմաց: Նրանք երկու անգամ փակել են Վարդենիս-Մարտակերտ ավտոճանապարհը: Ասացին, որ գիշերը երիտասարդների մոտ դանակներ են եղել, տհաճ զարգացումներ կարող են լինել, ինչպես Զարթոնք գյուղում: Ես հանդիպել եմ գյուղապետի հետ: Նա ասել է, որ հրաժարական չի տալու, եւ եթե չարաշահումներ են եղել, թող իրավապահները զբաղվեն»:
Փաշինյանը վկայակոչեց Զարթոնք համայնքի իրավիճակը. «Եթե միջամտեինք, կասեին, որ կառավարությունը ճնշում է գործադրում համայնքի ղեկավարի վրա: Երբ իրավիճակը սրացավ, ասացին, թե ուր է կառավարությունը: Հեղափոխությունից հետո բոլոր համայնքներում, որտեղ կա խնդիր եւ բողոքի ալիք, գյուղապետերը պետք է հրաժարական տան: Եթե վստահ են, որ ունեն գյուղի ժողովրդի վստահությունը, նորից կընտրվեն: Մենք չենք պատրաստվում որեւէ տեղ քվեաթերթիկ կեղծել»:
Ինչ վերաբերում է դանակներին, Նիկոլ Փաշինյանը նշեց. «Ոստիկանությանը հատուկ հանձնարարված է՝ ովքեր կփորձեն բռնությամբ հարց լուծել, բանտում են հայտնվելու: Որեւէ մեկը չփորձի ՀՀ-ում դանակ կամ զենք խաղացնել, այլապես ասֆալտին կփռենք կամ պատերով կտանք: Եթե մի քրեական գործով որեւէ մեկը կարողանա պլստալ ինչ-որ մեկի շնորհիվ, մեկ այլ քրեական գործով վզներից բռնելու ենք»:
Կարդացեք նաև
Լուիզա ՍՈՒՔԻԱՍՅԱՆ
