Հունահռոմեական ոճի ըմբշամարտի Հայաստանի ազգային հավաքականի գլխավոր մարզիչ Լեւոն Ջուլֆալակյանն այսօր լրատվամիջոցների հետ հանդիպման ժամանակ ասաց, որ Արթուր Ալեքսանյանն աշխարհի անցած տարվա առաջնությունից հետո երկարատեւ բուժում է անցել. «Այսօր նա լիարժեք ապաքինվել է վնասվածքներից, մասնակցում է մարզումներին, չի բողոքում վանսվածքներից եւ տրամադրված է շատ մարտական: Եվրոպական խաղերին մենք մասնակցելու ենք 60, 67, 77, 87 եւ 97 կգ քաշային կարգերում: Թե ովքեր կլինեն ըմբիշները հիմա չեմ ասի, բայց Արթուր Ալեքսանյանն 99 տոկոսով կմասնակցի»:
Aravot.am-ը հետաքրքրվեց. «Պարոն Ջուլֆալակյան: Անցած տարի, երբ Արթուր Ալեքսանյանը աշխարհի առաջնությունից հետո բուժման նպատակով մեկնեց ԱՄՆ, համացանցում լուրեր տարածվեցին ու դրանք հիմա էլ պարբերաբար մեջտեղ են գալիս, իբր «Ճերմակ Արջի» առողջությունը չի հետաքրքրում ՀԱՕԿ-ին եւ սպորտի պետական կառույցին եւ նա բուժվում է իր սեփական միջոցների հաշվին: Դուք որպես հավաքականի գլխավոր մարզիչ, ի վերջո, կտա՞ք վերջնական մեկնաբանություն, որպեսզի այդ հարցը մեկընդմիշտ օրակարգից դուրս գա»:
Հավաքականի գլխավոր մարզիչը պատասխանեց. «Այդ հարցը երեւի հարյուր անգամ շոշափվել է: Արթուր Ալեքսանյանն իր ցանկությամբ է մեկնել: Բացառված է, որ մեր պետությունը, նախարարությունը, Ազգային օլիմպիական կոմիտեն չֆինանսավորեն: Կրկնում եմ՝ դա բացառված է: Ստացվեց այնպես, որ իրեն հրավիրեցին ընկերները, պայմաններ ստեղծեցին, Արթուրն էլ իր որոշումով մեկնեց Միացյալ Նահանգներ ու բուժումներ անցավ: Զարմանալի է, որ նույն բանը կրկնվում է տասնյակ անգամներ: Հուսով եմ, որ այդ թեման այլեւս չի կրկնվի: Արթուր Ալեքսանյանը մեկնել էր սեփական նախաձեռնությունով: Նորից եմ ասում. Արթուր Ալեքսանյանի համար երբեք խնդիրներ չեն եղել ու չեն լինի մեր երկրում՝ ոչ նախարարության, ոչ էլ Ազգային օլիմպիական կոմիտեիկողմից»:
Աշոտ ՀԱԿՈԲՅԱՆ
