Այսօր լրագրողների հետ հանդիպման ժամանակ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանն անդրադարձավ հայ-իրանական երկաթուղուն: Սա ՀՀ 3-րդ նախագահ Սերժ Սարգսյանի նախընտրական խոստումներից էր:
Այս երկաթուղու մասին պարբերաբար հայտարարություններ են եղել. նշում էին՝ շինարարության համար Իրանը Հայաստանին կտրամադրի $400 միլիոն, ընդ որում, ՀՀԿ իշխանության ժամանակ՝ 2009-ին, հայտարարվեց, որ ճապոնական «Պադեկա» ընկերությունը արդեն սկսել է երկաթուղու կառուցման նախագծային եւ նախահաշվարկային աշխատանքները, որի իրականացման համար $1 միլիոն տրամադրելու է Ասիական զարգացման բանկը:
Իսկ 2016-ին էլ այս ոլորտի նախկին նախարար Վահան Մարտիրոսյանն էլ ասել էր՝ երկաթուղու կառուցման համար անհրաժեշտ է 3 միլիարդ դոլարից ավելի գումար:
Մինչդեռ, Հակոբ Արշակյանը հայ-իրանական երկաթուղու կառուցման հեռանկար չի տեսնում:
Կարդացեք նաև
«Եթե շատ հարուստ երկիր լինեինք՝ զուգահեռ կսկսեինք մտածել նաեւ երկաթուղու մասին: Բայց եթե մենք մայրուղի ենք (Հյուսիս-հարավ) կառուցում այդ մասշտաբի, այս պահին իմ առաջնահերթությունների ցանկում չկա երկաթուղի կառուցելը»,-ասաց Արշակյանը:
Նախարարը նաեւ հավելեց՝ եթե լինի առաջարկ, որը դրված կլինի սեղանին՝ մեծ հաճույքով կքննարկեն.«Բայց հաշվի առնելով , որ լեռնային գոտի է մեր հարավային մասը, եւ հաշվի առնելով, որ լուրջ ֆինանսական միջոցներ են պետք լինելու ներգրավել, եւ հիմա հաշվի առնելով, որ մենք մեծ ֆինանսական ներդրումներ ենք անում Հյուսիս-Հարավ ճանապարհի համար, թույլ տվեք այդ մասով բան չասեմ: Ես չեմ տեսել այդպիսի գնահատական, թե օրինակ՝ ի՞նչ էֆեկտի կբերի դա, ինչքան կարժենա, արդյոք արժե կառուցել, թե՝ ոչ: Եվ այդ ուսումնասիրությունը կատարելու համար շատ լուրջ ուժեր են պետք»:
Ճշտող հարցին՝ անգամ ուսումնասիրություն չի՞ եղել, նախարարը պատասխանեց՝ «Ես չեմ տեսել էդպիսի փաստաթուղթ»:
Նելլի ԲԱԲԱՅԱՆ
