Հայաստանում միջպետական ճանապարհներն ամեն տարի «կարկատվում» էին, փոսալցվում, ամեն տարի վերանորոգվում ու կարճ ժամանակ անց ճանապարհը նորից ասֆալտապատելու կարիք էր ունենում:
Նման ճանապարհներ Հայաստանով մեկ տարիներ շարունակ եղել են: Ցանկացած մեկը, եթե միջպետական ճանապարհներից՝ Տավուշի մարզում՝ Ոսկեպար-Նոյեմբերյան հատվածով երթեւեկել է, հաստատ դժգոհել է քարուքանդ ճանապարհներից:
Aravot.am-ն անցյալ տարի Տավուշի մարզի Աճարկուտ համայնքից մինչեւ Ոսկեպար, Նոյեմբերյանից մինչեւ Ջուջեւան, ապա դեպի Վրաստան ճանապարհի քայքայված վիճակին անդրադարձել էր:
Վերջերս էլ կառավարության նիստին վարչապետ Փաշինյանն էր անդրադարձել:
Այսօր Aravot.am-ը տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանից հետաքրքրվեց՝ ի՞նչ է անում նախարարությունը, որպեսզի ճանապարհաշինությունը պատշաճ իրականացվի, ճանապարհաշինական ընկերություններն, ըստ մամուլի հրապարակումների, պատկանում են նախկին պաշտոնյաներին, ինչ թերացումներ են արձանագրել նախկին պաշտոնյաներին պատկանող նման ընկերություններում:
Արշակյանը մեր հարցին ի պատասխան նշեց՝ վարչապետի ասածը վերաբերում է Ոսկեպար-Նոյեմբերյան ճանապարհահատվածին, այդտեղ արձանագրվել է անորակ աշխատանք.«Եվ քանի որ մենք աշխատում ենք հետվճարային համակարգով, պարբերաբար մոնիտորինգ ենք անում շինարարության ընթացքը, այն դադարեցվել է»:
Նախարարն ասաց, որ այդ ճանապարհն անցյալ տարի լրացուցիչ ֆինանսավորման շրջանակում էր իրականցվում, սեզոնային ուշացում կար, հնարավոր չեղավ անցյալ տարի վերականգնել վնասը. «Ու չվճարեցինք, մինչեւ հիմա չենք վճարել, չի ընդունվել ճանապարհը: Շինարարական ընկերությունը պարտավորություն է վերցրել շտկելու ամբողջ ճանապարհի որակի խնդիրները: Սեզոնը մեկնարկելուն պես՝ մայիսի առաջին կեսին, պետք է սկսի շինարարական պրոցեսը: Ամբողջ պրոյեկտը նորից իրականացնելու է: Մենք հսկողություն ենք իրականացնելու ավելի կարճ պարբերականությամբ, որպեսզի համոզվենք, ու խնդիր չառաջանա»:
Ինչ վերաբերում է նման ընկերությունների սեփականատերերին եւ նրանց աշխատաոճին, ապա Արշակյանն այսպես մեկնաբանեց. «Երբ մենք մրցույթներն իրականացնում ենք բաց, թափանցիկ, եւ վերահսկողությունն իրականացնում ենք խիստ, անկախ նրանից, թե ով է այս կամ այն շինարարական կազմակերպության տերը, տնօրենը, նախկին կամ ներկա պաշտոնյա է, թե՝ ոչ, մենք իրականացնում ենք հսկողություն: Եթե չի արվում պատշաճ որակի՝ չի վճարվում: Սա է ամբողջ տրամաբանությունը: Եվ կարծում եմ, որ դա բավարար է, որպեսզի մենք համոզված լինենք, որ ճանապարհաշինական ոլորտում խնդիրներ չեն լինի»:
Նախարարն ասաց, որ էլի կան ընկերություններ, որոնք ոչ պատշաճ որակի շինաշխատանքների համար չեն վճարվել. Կապալառուների անուններ չտվեց. Անուններ անգիր չէր հիշում:
Իսկ վարչապետի ասած՝ Ոսկեպար-Նոյեմբերյան ճանապարհահատվածի շինարարությունն իրականացնում է, ինչպես նախարարն ասաց՝ «Վառմաշ» ընկերությունը: Այս ընկերությունն, ըստ մամուլի հրապարակումների, պատկանում է ՀՀԿ նախկին պատգամավոր Հերմինե Նաղդալյանի ընտանիքին:
«Էլի ճանապարհահատվածներ են եղել, որոնց դիմաց չենք վճարել, եղել են ճանապարհահատվածներ, որոնք ամբողջությամբ վերականգնվել են: Եթե տեսնում ենք, որ մարդիկ վերացնում են թերությունները, կարծում եմ, որ արդեն նորմալ գործընկերային հարաբերություններ են, չեմ կարծում թե արժե անուն առ անուն նշել»:
Մանրամասն՝ տեսանյութում
Այսօր նախարարը ասուլիսին անդրադարձել է ավտոմեքենաների տեխզննման նոր համակարգին եւ ճանապարհաշինությանը, թե ինչու հենց այս ոլորտները, որովհետեւ, ըստ նախարարի, առաջիկայում այդ երկու ոլորտները փոխանցվելու են տարածքային կառավարման նախարարությանը:
Նելլի ԲԱԲԱՅԱՆ
