Կառավարություն-ԱԺ հարցուպատասխանի ժամանակ այսօր «Լուսավոր Հայաստան» խմբակցության պատգամավոր Արմեն Եղիազարյանը վարչապետ Նիկոլ Փաշինյանին հետեւյալ հարցադրումն ուղղեց. «ԵԽԽՎ-ում դուք հայտարարեցիք, որ 50.000 ստվերային աշխատողներ արդեն հարկային դաշտում են գործում, բայց «1000 դրամների հիմնադրամ»-ին գումար փոխանցողների թիվն ավելացել է 5000-ով, սա ինչպե՞ս կպարզաբանեք: Կամ ձեզ սխալ թվեր են ներկայացվել, կամ այդ 50.000 հոգին չեն վճարում հիմնադրամի համար»:
Նիկոլ Փաշինյանն այսպես պատասխանեց. «Աշխատատեղերի մասով թվերը չեն կարող սխալ լինել, դրանք ԱՎԾ եւ ՊԵԿ տվյալներն են: Իսկ հիմնադրամի հետ կապված հավելյալ պարզաբանումներ կստանամ: Նորություն չէ, որ այդ հիմնադրամի վճարումների ամբողջականության խնդիր կա: Ես նման տեղեկություններ եմ ստանում, որ միշտ չէ եւ ամենուրեք չէ, որ պարտաճանաչ կերպով վճարում են: Խոսքը նաեւ ամբողջական ընկերությունների մասին է: Կառավարությունը պետք է միջոցներ ձեռնարկի՝ դա ապահովելու համար»:
Լուիզա ՍՈՒՔԻԱՍՅԱՆ
