ԱԺ-կառավարություն հարցուպատասխանի ժամանակ այսօր «Լուսավոր Հայաստան» խմբակցության պատգամավոր Սարիկ Մինասյանը հետեւյալ հարցը բարձրաձայնեց. «Մամուլում տեղեկություններ կան այն մասին, որ «Գազպրոմ Արմենիա»-ն պատրաստվում է 3000 աշխատատեղ կրճատել: Իմ տեղեկություններով՝ Շիրակի մարզում միայն ընկերությունն ունի 450 աշխատող, որոնցից 120-ն ապրիլի 19-ին կրճատման մասին ծանուցում են ստանալու: Ի՞նչ կարող է անել կառավարությունն այս ուղղությամբ»:
Հարցին արձագանքեց ՀՀ փոխվարչապետ Մհեր Գրիգորյանը. «Չեմ կարծում, որ նման զանգվածային կրճատումների մասին է խոսքը, որովհետեւ կրճատումները կամ օպտիմալացումը պայմանավորված են լինում ներքին կառավարման համակարգի զարգացմամբ: Օրինակ՝ տեսուչների քանակը գուցե այնքան էլ պետք չէ, որովհետեւ հաշվիչների ձեւերն են փոխվել: Կան այլ ուղղություններ եւս, որոնց արդյունքում աշխատակիցների քանակը գուցե կրճատվի, բայց հազարավոր թվերը, վստահ եմ, որ իրականությանը չեն համապատասխանում»:
Սարիկ Մինասյանը շարունակեց մտահոգությունը. «Դա կապված է գազի գնի թանկացման հետ. քանի որ սպառողների համար գազը չի թանկանում, «Գազպրոմ Արմենիա»-ն կրճատումների միջոցով է հարցը լուծում: Ինչ-որ լուծումներ պետք է առաջարկվի «Գազպրոմ»-ին, որ մարդիկ չկորցնեն աշխատանքը»: Մհեր Գրիգորյանը նշեց. «Ողջամտության սահման կա, որը վերաբերում է բոլոր ընկերություններին: Չկա ընկերություն, որում կրճատումներ չեն լինում: Չեմ կարող հաստատել, որ կանենք ինչ-որ բան՝ այս կամ այն ընկերությունում կրճատումները բացառելու նպատակով»:
Լուիզա ՍՈՒՔԻԱՍՅԱՆ
