«Գագիկի կողքին եղած ձեզնից որևէ մեկը Գագիկի մայկան բարձրացրե՞լ եք, տեսե՞լ եք վերքը, որ կապիկությամբ ասում եք, թե ձեռքից է եղել: Մի ժպտացեք, այստեղ ժպտալու բան չկա»,- «Սասնա ծռերի» գործով դատական նիստին հայտարարեց ՊՊԾ գնդի տարածքում զոհված, գնդի հերթապահ ծառայության հերթապահի օգնական, ոստիկանության ավագ ենթասպա Գագիկ Մկրտչյանի այրին՝ Հասմիկ Ոսկանյանը:
Դատարանում հարցաքննվող Հասմիկ Ոսկանյանը մանրամասներ ներկայացրեց իր ու իր ամուսնու՝ հիվանդանոցային խոսակցությունից: Նա նշեց, որ իր ամուսինը որոշ մանրամասներ է ներկայացրել իր քրոջը՝ Մերի Մկրտչյանին:
Տիկին Ոսկանյանը պատմեց՝ չի պատկերացրել 2016-ի հուլիսին ինչ է կատարվում քաղաքում, քանի որ հեռախոսն ինտերնետ չուներ: Այնուհետև ներկայացրեց իր և Գագիկ Մկրտչյանի խոսակցությունը. «Ինձ երկրորդ օրը հիվանդանոցում պատմեց, որ ժամը 5.00-ի 6.30-ի կողմերը կրակոցներ է լսել: Ասաց՝ դռները փակել են, կապ եմ տվել շտապօգնություն ու տագնապ եմ բարձրացրել: Կրակոցները անընդհատ հնչել են. եկել են դուռը բացելու, ինքը չի բացել: Եթե չեմ սխալվում կրակոցով դրսի դուռն են բացել, մտել հերթապահ մաս: Լեզվակռիվ է եղել: Խնդրեցի նկարագրել: Ամուսինս չորս վիրահատություն է ունեցել փորի հատվածում և հինգերորդը ձախ ձեռքի արմունկային մասում, որտեղ իրենք կրակել են ու դուրս է եկել փորից»:
Հասմիկ Ոսկանյանը շարունակեց, որ ամուսինը պատմել է՝ երեք հոգով մտել են ներս, պառկեցրել են գետնին, որ երևի ձեռքերը կապեին. «Ամուսինս պատմեց, որ երեք հոգով են եղել՝ մեկը փրչոտ, կոլոտ, մյուսը բոյով, լիքոտ: Պատմեց՝ լեզվակռիվ տվեցի դուռը չբացելու համար: Երկու քայլ հետ գնացի, ավտոմատը վրաս պահեց ու խփեց: Երդվում եմ՝ իմ ցուցմունքն ամուսնուս բառերով է»:
Կարդացեք նաև
Նախագահող դատավոր Մեսրոպ Մակյանը հայտարարեց, քանի որ տուժողի իրավահաջորդը նշեց Մերի Մկրտչանի անունը, որ Գագիկ Մկրտչյանը նաև նրան է պատմել դեպքի հանգամանքների վերաբերյալ, ուստի դատարանը կողմերի կարծիքն է ցանկանում լսել, թե նշված անձին հարցաքննելու ուղղությամբ ինչ կարծիքներ կան: Կողմերը չառարկեցին:
Տաթև ՀԱՐՈՒԹՅՈՒՆՅԱՆ
