«Աշխատանքների այն ծավալը, որը նախագծի սկզբում հայտնի էր, հաշվարկված էր մեկ օրացույցային շրջանի համար, աշխատանքների ընթացքում ի հայտ եկան նոր առաջադրանքներ, նոր տեղեկատվություն: Ինչը նորմալ է եւ չի կարելի համարել խնդիր»,-պատասխանելով հարցին՝ ինչո՞ւ է հայկական կողմը դիմել ատոմակայանին տրամադրված ռուսական վարկի սպասարկման ժամկետը երկարաձգելու համար, ասաց «Ռուսատոմ Սերվիս» ընկերության տնօրեն Եվգենի Սալկովը: Պարոն Սալկովը մասնակցում էր Սոչիում կազմակերպված «Ատոմէքսպո 2019» միջազգային համաժողովին:
Հիշեցնենք, որ Հայաստանի ատոմակայանի արդիականացման աշխատանքների համար Ռուսաստանի կառավարությունը հատկացրել է 300 միլիոն դոլար, որից 270-ը վարկային միջոցներ են, 30 միլիոնը՝ օգնություն դրամաշնորհի տեսքով: ՀԱԷԿ-ի էներգաբլոկի շահագործման ժամկետի երկարաձգման աշխատանքներն իրականացնում է «Ռուսատոմ Սերվիս» ընկերությունը:
Եվգենի Սալկովի խոսքով, Հայաստանի ֆինանսների նախարարությունը դիմել է Ռուսաստանի Դաշնությանը՝ վարկի մարման ժամկետը երկարաձգելու, քանի որ ոչ ամբողջ գումարն է ծախսվել: Այս պահին, ըստ «Ռուսատոմ Սերվիսի» տնօրենի, ժամկետի երկարաձգման շուրջ բանակցություններ են ընթանում. «Այդպիսի խնդիր դրված էլ չէր, որ ամբողջ գումարը պետք է ծախսվեր: Այս պահին գնում են աշխատանքներ, որը ապագայում հնարավորություն կտա անվտանգ ու արդյունավետ շահագործել էներգաբլոկը, այլ ոչ թե հիմնական խնդիրը ամբողջ գումարը ծախսելն էր»:
Մանրամասները՝ տեսանյութում
Կարդացեք նաև
Aravot.am-ի հարցին՝ 300 միլիոն դոլարը կբավականացնի՞ արդիականացման աշխատանքներն ավարտին հասցնելու համար, քանի որ ասացիք՝ ընթացքում նոր առաջադրանքներ են ի հայտ եկել, պարոն Սալկովը պատասխանեց՝ այն նախագծերը, որոնք «Ռուսատոմ Սերվիսի» պատասխանատվության տիրույթում են, միջոցները կբավականացնեն իսկ մնացած խնդիրները ՀԱԷԿ-ն ինքը կֆինանսավորի:
Տեսանյութը՝ շուտով
Ի դեպ, նույն համաժողովի ժամանակ էներգետիկ ենթակառուցվածքների եւ բնական պաշարների փոխնախարար Հակոբ Վարդանյանը հույս էր հայտնել, որ ռուսական կողմը վարկի սպասարկման ժամկետը կերկարաձգի մինչեւ 2021 թվականը:
Լուսինե ԲՈՒԴԱՂՅԱՆ
